Թուրքիայում ամուսինը ժայռի եզրին «սելֆի» է արել հղի կնոջ հետ, իսկ հետո նրան 300 մետր բարձրությունից ցած նետել, գրում է Mirror-ը։

Պարբերականը հաղորդում է, որ ոստիկանությունը 40-ամյա Հաքան Այսալին մեղադրում է 2018 թվականի հունիսին Մուղլա քաղաքում հանգստի ժամանակ կնոջը՝ 32-ամյա Սեմրա Այսալին, 300 մետր բարձրությունից ցած հրելու համար, որի հետևանքով հղիության յոթերորդ ամսում գտնվող կինը մահացել է։

Թեև ամուսինը հրաժարվում է ընդունել իր մեղավորությունը, ոստիկանությունը պնդում է, որ «դժբախտ պատահարն» իրականում ծրագրված է եղել Այսալի կողմից, որպեսզի կարողանա գումար շորթել ապահովագրական ընկերությունից։

Մեղադրական եզրակացության մեջ ասվում է, որ նա «պլանավորել է իր կնոջ սպանությունը՝ նրա անունից նախապես ձևակերպելով դժբախտ պատահարներից 400 հազար թուրքական լիրա (մոտ 55000 դոլար) երաշխիքով անձնական ապահովագրություն»։

Եզրակացության մեջ նշվում է, որ երեք ժամ զույգը նստել է ժայռի գագաթին, քանի որ ամուսինն, իր կանխամտածված հանցագործություն իրագործելուց առաջ, փորձել է համոզվել՝ շրջակայքում մարդ չկա։

Տղամարդը հերքում է մեղադրանքները՝ պնդելով, որ կինը պատահմամբ է ժայռից ցած ընկել։