Լրագրողների հետ  հանդիպման ժամանակ «Ժառանգություն» կուսակցության ղեկավար Րաֆֆի Հովհաննիսյանը, խոսելով գալիք նախագահական ընտրությունների մասին, ասել է, որ ՀՀ չորրորդ նախագահն այլ գույն է ունենալու և էապես տարբերվելու է նախորդ երեքից։ Հարցին՝ իսկ ի՞նչ գույն պետք է ունենա ՀՀ չորրորդ նախագահը, նա պատասխանել է, որ այդ գույնը ոչ միայն նախագահին է վերաբերվում, այլև  ընդհանրապես մեր կյանքին։

–Ավագ որդիս՝ Կարինը, ՀՀ արդի պատմության մասին գիրք է գրել՝ «Գերդաստան ստվերաց», որով ներկայացրել է մեր երեք սերունդները պայմանականորեն ՀՀ պետական դրոշի երեք գույներով։ Ունենք կարմիր սերունդը՝ հայրենազրկված, ցեղասպանություն տեսած  սերունդ, վերականգնման, ազատություն որոնող կապույտ սերունդը և ավագ սերունդը, որը ժամանակին նարնջագույն էինք ասում, հիմա՝ ծիրանագույն։ Այս չորրոդ գույնի հարցը վերաբերում է ոչ միայն 4–րդ նախագահի գույնին, բույրին, թե ակցենտին, այլ նոր  սերնդի  գույնն է, որն էլ լինելու է Հայաստանի դրոշակի, երիտասարդության, ապագայի գույնը. դա դուք պետք է որոշեք,–ասել է նա։

Րաֆֆի  Հովհաննիսյանը նաև ասել է, թե կարծում է, որ ՀՀ չորրորդ նախագահության հավանական թեկնածուն ինքը չէ։

Պատասխանելով հարցին՝ ո՞վ է լինելու ՀՀ հաջորդ նախագահի հավանական թեկնածուն՝ նա ասել է.

–Կան հարյուրավոր տղամարդիկ ու կանայք, ովքեր կարող են դառնալ նախագահ։

Հարցին, թե ինչո՞ւ է հրաժարվում իր թեկնածությունից, Րաֆֆի Հովհաննիսյանն ասել է, որ ինքն ասում է, թե հավանական չէ, այլ ոչ թե հրաժարվում է որևէ բանից։

–Ես ուզում եմ, որ Հայաստանն ունենա քաղաքական արդյունք։ Ես անընդհատ կրկնում ու չարչարում եմ այդ եզրույթը։ Քաղաքական արդյունք և «դե յուրե»։ Մենք պետք է վերջապես 1995–ից այս կողմ ունենանք իրավացի իրավական երկիր, և դա իրացնելու և ավելի մոտ բերելու  համար ես պատրաստ եմ իմ թեկնածությունը դարձնել ավելի հավանական կամ առավել անհավանական,–ասել է նա։

7or.am