Այսօր կայացած ասուլիսում երգիչ Արթուր Իսպիրյանը, անդրադառնալով շոու–բիզնեսի վիճակին, ասել է.

–Եթերային ֆիլտրի պակասությունը շատ է նյարդայնացնում. դա շատ կարևոր է, բայց այսօր չկա։

Նա նշեց, որ երբ ինքը խոսում է հեռուստաընկերությունների տնօրենների ու պրոդյուսերների հետ, բոլորին մտահոգում է սեփական հեռուստաընկերությունների վարկանիշը։

–Իսկ այդ վարկանիշը նրանք ապահովում են եթերային աղբով,–գտնում է երգիչը։

Եթերը վերահսկելու համար նա կոչ է անում ստեղծել գեղխորհուրդ, ինչը և կսահմանի որոշակի չափանիշներ.

–Գեղխորհուրդը պետք է կազմված լինի լուրջ մարդկանցից, ոչ միայն հին, այլև նոր մտածելակերպ ունեցող մարդկանցից։ Դրա անհրաժեշտությունը միշտ էլ եղել է, և հիմա էլ է պետք։

Նրա խոսքերով՝ այսօրվա եթերը պետական անվտանգության խնդիր է, քանի որ այն սերունդ է փչացնում։

Երգչի կարծիքով ռեստորանը տեղափոխվել է եթեր. այն այսօր արաբական ռիթմերով է ողողված։

–Եթե ինձ հանձնեին լծակները, ես կմաքրեի շոու–բիզնեսի դաշտը,–հավելել է Ա. Իսպիրյանը։

7or.am