Ազգային ժողովում ՀՀԿ խմբակցության ղեկավար Գալուստ Սահակյանը պատասխանել է լրագրողների հարցերին

-Ինչքանո՞վ Ռոբերտ Քոչարյանի հայտարարությունը կազդի ՀԱԿ-իշխանություն երկխոսության վրա:

-Այդ երկխոսությունը չի կարելի հայհոյանքի պես մի բան դարձնել: Մարդիկ արդեն, երբ  ցանկանում են մեկը մյուսին վիրավորել, ասում են. «Ես քեզ կերկխոսեմ»: Բազմիցս կրկնել եմ՝ քաղաքական դաշտը մեկն է, և բոլոր քաղաքական ուժերի իրավունքները նույնն են, հավասար են, այնպես որ քաղաքական դաշտը կամ քաղաքական գործընթացը հենց փոխադարձ համաձայնությունների, որոշումների, քննարկումների դաշտն է: Ուրիշ այլ զենք քաղաքական դաշտն ունենալ չի կարող:

-Իսկ Ռոբերտ Քոչարյանին տեսնո՞ ւմ եք այդ դաշտում:

-Ինքը՝ Քոչարյանը պետք է որոշի՝ այդ դաշտո՞ւմ է, թե՞ ոչ, պետք է ակտիվանա՞, թե՞ ոչ:

-Վերջերս շատ են խոսակցություններ շրջանառվում այն մասին, որ ՀԱԿ-ն արդեն վստահված անձերին է պատրաստում արտահերթ ընտրությունների համար…

-Միշտ էլ մեծանուն մարդկանց շուրջ առասպելներ են հյուսում, և դա էլ եմ բնական համարում, նայած թե այդ առասպելները որին ինչքանով են դուր գալիս, կամ ով է ստեղծում և ինչի համար:

-Այսինքն, արտահերթ ընտրությունների հավանականությունն առասպե՞լ է:

-Բազմաթիվ անգամ արդեն ասել ենք, որ արտահերթ ընտրությունները եթե նույնիսկ հնարավոր լինեն, Սահմանադրությունն իր սցենարներն ունի, և կարծում եմ՝ այդ սցենարներին համապատասխան որևէ իրավիճակ չկա: Ասենք, արտահերթ ընտրություն կարող է լինել, եթե երկու ամիս շարունակ օրենսդիր մարմինն օրենքներ չընդունի: Դա տեսականորեն կարող ենք ընդունել:

-Դա հնարավոր է կազմակերպել:

-Եթե կազմակերպիչները նրանք լինեն, ովքեր միտում ունեն երկիրը ցնցումների տանել, բնականաբար, կարող է լինել: Դրա համար ցնցումների տանողներից հարցրեք:

-Իսկ տարօրինակ չե՞ք համարում, որ այս երկիրը ցնցումների տանողներն ասում էին՝ «ավազակապետություն, կոռումպացվածներ, թաթար-մոնղոլական համակարգ» և այլն, ու հիմա իրենք երկխոսում են: Ինչի՞ շուրջ են երկխոսում այդ դեպքում:

-Ես չեմ կարծում, որ Ձեր խոսքը վերաբերում է ՀԱԿ-ին. ժողովուրդը կարողացավ, համենայնդեպս, ամբողջ ընթացքում զգալ, որ դա լուրջ քաղաքական գործառույթ չէ: Դրա համար, նորից եմ ասում, յուրաքանչյուր խնդիր քաղաքական դաշտում պետք է որոշվի, ոչ թե քաղաքական դաշտից դուրս: Այսօր ՀԱԿ-ը կամաց-կամաց մտնում  է քաղաքական դաշտ: Դրա անհրաժեշտությունը մենք տեսնում ենք ոչ թե ինչ-որ փառավորությունների կամ չգիտեմ ինչ սիրավեպեր երգելու մեջ, այլ նրանում, որ ինչքան քաղաքական դաշտը կայուն լինի, այնքան կայուն զարգացումներ կունենանք, այնքան կկարողանանք սոցիալական խնդիրներ լուծել:

-Քոչարյանն էլ ասել էր, որ եթե ընդդիմություն չլինի, ոչ ոք չի կարող ազդել իշխանության վրա, և երկխոսության արդյունքում էլ ոչ ոք չի զսպի իշխանությանը:

-Ընդդիմությունը քաղաքական դաշտի ամենակարևորագույն գործիքներից մեկն է, որը միշտ զգոն պիտի պահի իշխանություններին:

-Լևոն Տեր-Պետրոսյանն ասաց, որ սա մեր երազած երկիրն է, այդ դեպքում երազած երկրին ինչո՞ւ էր հայհոյում:

-Ես չեմ լսել հայհոյանք:

-Ինչո՞ւ հենց հիմա արձագանքեցիք, պարո՛ն Սահակյան: Լևոն Տեր-Պետրոսյանը 2009–ից երկխոսության առաջարկներ էր անում, իրեն մատուցարանի վրա էր մատուցում տարբեր ձևերով:

-Լևոն տեր-Պետրոսյանը նման ճանապարհով ոչ միայն չէր գնում, այլ բազմիցս մեր պետության համար կարևորագույն ռազմավարական խնդիրների հրավերներ է ստացել: Քաղաքական ուժերից 50-ից ավելին մասնակցել է, Լևոն Տեր-Պետրոսյանը չի մասնակցել:

-Իսկ հիմա ինչի՞ եք ասում, որ գա մասնակցի:

-Իսկ ո՞վ է ասում, որ գա մասնակցի, մենք ընդամենն ասում ենք՝ ինչքան կառուցողական լինեք, այնքան մեր պետության ու ժողովրդի անհրաժեշտությունն է: Նոր՝ քիչ առաջ, ասացի, Ձեզ թվում է՝ ամեն գիշեր երազ ենք տեսնում, առավոտյան էլ մտածում ենք, թե երբ պետք է  Լևոնին տեսնե՞նք:

-Գիշերային որոշումները բնորոշ են Հանրապետականին:

-Մենք գիշերները լրիվ այլ որոշումներ ենք կայացնում:

-Իսկ Սասուն Միքայելյանին ազատ արձակելու մասին քաղաքական որոշում կայացվե՞լ է:

-Չեմ կարծում, որ դա քաղաքական որոշում կայացնելու բարդ խնդիր ուներ: Խորհրդարանական ուժերը, գտնելով, որ առողջական վիճակն այնքան ծանր է, որ վաղաժամկետ ազատ արձակելու մասին օրենքը հնարավորինս կարելի է իրագործել, ընդամենը դիմել են երկրի նախագահին:

- Դա ե՞րբ կլինի:

-Ես բանտապահ չեմ, որ իմանամ՝ երբ կլինի:

-Պարո՛ն Սահակյան, ասում են, որ վերջին տասնօրյակում ԲՀԿ-ՀՀԿ հարաբերությունները խիստ լարվել են:Ասում են՝ լուրջ խմորումներ են ընթանում:

-Դա ընդդիմադիր դաշտի երազանքն է: Ես ամբողջ օրն եմ հանդիպում «Բարգավաճի» տղաների հետ, այնպես որ, մենք խմոր չենք հունցում, ընդամենը լավաշ ենք թխում:

-Պարո՛ն Սահակյան, շատ է խոսվում նաև, որ ՀԱԿ-ը հանձնաժողով է ստեղծում երկխոսության համար:

-Ես այդ բառի փիլիսոփայությունն արդեն չեմ ընդունում: Երկխոսությունը հանձնաժողով չեմ ընդունում: Հանդիպում են իրար, խնդիրները դնում, ու սկսում ենք քննակել:

-Արդար չի՞ լինի, որ Լևոն Տեր-Պետրոսյանը Ձեր կոալիցիոն գործընկերոջից (նկատի ունեմ Արթուր Բաղդասարյանից) ներողություն խնդրի իր նախկին մեղադրանքների համար, այդ թվում նաև Արտաշես Գեղամյանից, որովհետև ինչ ասես՝ նրանց չէր ասում Ձեր հետ երկխոսելու համար, իսկ հիմա ինքը նույնն է անում:

-Գիտե՞ք, երբ պետության համար կարևորագույն խնդիրներ են լուծվում, բոլորը պետք է զենքները վայր դնեն, ճիշտը դա է:

-Այսինքն, ներողություն պե՛տք է խնդրի:

-Չէ՛, զենքերը վայր են դնում, ընդհանրապես մեկը մյուսին պետք  է հանդուրժի, մանավանդ զանգվածային միջոցառումների ժամանակ որոշակիորեն և՛ հասարակությունն է ակտիվանում, և՛ քաղաքական թիմերն ու քաղաքական գործիչները:

-Պարո՛ն Սահակյան, ինչ ասես՝ ասաց, «ԱԽՔ» որակեց, «դհոլ» որակեց…

-Կարծում եմ՝ ով ում ինչ ասել է, անպայման հակադարձումը եղել է, այնպես որ, այսօր արդեն սպառվել են այդ փամփուշտները, հիմա հարկավոր է նոր զենքի տեսակով գնալ:

-Զենքի տեսակն ունե՞ք:

-Իհա՛րկե:

Ներկայացրեց Արփի Բեգլարյանը