«Ռոյթերս» գործակալությունը, հղում անելով ապստամբների ներկայացուցիչներին, հաղորդում է, որ Լիբիայի առաջնորդ Մուամար Քադաֆիի զորքերը երկուշաբթի երեկոյան գնդակոծել են երկրի հյուսիս–արևմուտքում ապստամբների վերահսկողության տակ գտնվող Զինտան քաղաքը։ Քաղաքի վրա բաց է թողնվել ամենաքիչը տաս հրթիռ։

«Մեր ուժերը ռմբակոծվել են Զինտանից հյուսիս գտնվող Քադաֆիի զորքերի կողմից»,–հայտնել է ընդդիմության ներկայացուցիչը։

Մայրաքաղաք Տրիպոլիից 160 կմ հարավ–արևմուտք գտնվող Զինտան քաղաքը վերջին շաբաթների ընթացքում գտնվում է ռազմական գործողությունների կենտրոնում, որոնք իրականացնում են մի կողմից ապստամբներն ու նրանց աջակցող ՆԱՏՕ–ի հրամանատարությամբ կոալիցիոն ուժերը, մյուս կողմից Քադաֆիին հավատարիմ զորքերը։ Լիբիական բանակը պարբերաբար ռմբակոծման է ենթարկվում կոալիցիոն ուժերի ինքնաթիռների կողմից։

Լիբիայում անկարգություններն սկսվել են փետրվարի 15–ից, երբ բողոքողների ցույցերն աստիճանաբար վերածվեցին զինված հակամարտության կառավարական զորքերի ու ապստամբների միջև։ Ընդդիմությունը պահանջում է երկիրն ավելի քան 40 տարի ղեկավարող նախագահ Մուամար Քադաֆիի հրաժարականը։

Հիշեցնենք, որ ՄԱԿ Անվտանգության խորհուրդը մարտի 17–ին որոշում էր ընդունել Լիբիայի օդային տարածքում ոչ թռիչքային գոտու սահմանման և օտարերկրյա ռազմական ներխուժման հնարավորության  մասին։