ՆԱՏՕ–ի գլխավոր քարտուղար Անդերս Ֆոգ Ռասմուսենը շնորհավորել է ԱՄՆ նախագահ Բարաք Օբամային ամերիկյան հատուկ նշանակության ուժերի կողմից «համար մեկ ահաբեկիչ» Ուսամա Բեն Լադենի վերացման կապակցությամբ։

«Ալ Քաիդայի» առաջնորդ Բեն Լադենը սպանվել է Պակիստանի մայրաքաղաք Իսլամաբադից ոչ հեռու գտնվող տներից մեկում։ Այս տեղեկությունը հաստատել է Բարաք Օբաման։ Նա հաղորդել է, որ գործողությունների իրականացման լիազորություն էր տվել դեռևս մեկ շաբաթ առաջ, և պակիստանյան իշխանությունները տեղեկացված են եղել դրա մասին։

Ըստ «ՌԻԱ նովոստի»–ի՝ Ռասմուսենի հայտարարության մեջ ասվում է.

«Այն նշանակալի հաջողություն է ՆԱՏՕ–ի դաշնակիցների ու այն բոլոր երկրների անվտանգության համար, որոնք միացել են մեզ համաշխարհային ահաբեկչության դեմ պայքարելու համար, որպեսզի աշխարհը դարձնենք ավելի անվտանգ վայր բոլորիս համար»։