Այսօր առավոտվանից աշխարհի լրատվամիջոցների գլխավոր  նորությունը «թիվ մեկ ահաբեկիչ» Ուսամա Բեն Լադենի սպանության լուրն էր։

«Ալ Քաիդայի» ղեկավարը սպանվել է Պակիստանի մայրաքաղաք Իսլամաբադին կից Աբոտաբադ քաղաքում՝ ԱՄՆ հատուկ ծառայությունների ռազմական գործողությունների հետևանքով գլխին հասցված կրակոցից։

Մահացածի դին գտնվում է ամերիկյան հատուկ ծառայությունների մոտ։ Նրա ինքնությունը հաստատվել է ԴՆԹ հետազոտությամբ։

Ինչպես հաղորդում է «Ամերիկայի ձայն» ռադիոկայանը՝ հղում անելով Պակիստանի «Express 24/7» անգլալեզու հեռուստաընկերությանը, Բեն Լադենի երկու կանայք, 6 երեխաներն ու 4 օգնականները ձերբակալվել են ամերիկյան զինվորականների կողմից։ Բեն Լադենի հետ սպանվել են ևս 20 մարդ։

Քաղաքի  շրջանը, որտեղ իրականացվել  են հատուկ  գործողությունները,  շրջափակված է զորքերով։ Տեղի  բնակիչներին խորհուրդ է տրվել  դուրս չգալ տներից։ «MSNBC» հեռուստաընկերությունը Սպիտակ  տան իր աղբյուրների հաղորդած տվյալներով պարզաբանում է որոշ մանրամասներ։

Բեն Լադենի  գտնվելու վայրի մասին տեղեկատվությունը ստացվել է Բեն Լադենի սուրհանդակներին հետևելու շնորհիվ։

2007–ին ճշգրտվել է այն սուրհանդակի ինքնությունը, ով Բեն Լադենի լիակատար վստահությունն էր  վայելում։ 2009–ին գտնվել են Պակիստանի այն շրջանները, որտեղ գործել են  սուրհանդակն ու նրա եղբայրը, իսկ 2010–ի օգոստոսին հայտնաբերվել է գողերի որջը՝ Աբոտաբադում շինությունների մի  բարդ համալիր։

Համալիրում անվտանգության միջոցառումներն արտակարգ են եղել՝ կրկնակի դարպասներով մուտք, 12–16 մ բարձրությամբ պատեր, ներքին պատեր և այլն։

Համալիրում չեն եղել  ո՛չ համացանց, ո՛չ  հեռախոսակապ։ Շինությունները կառուցված են եղել  2005թ. քաղաքի ծայրամասում գտնվող ընդարձակ տարածության վրա։

Շինարարության համար մի քանի միլիոն դոլար գումար է ներդրվել։ Բացի  երկու եղբայրներից՝ տանն ապրել է նաև երրորդ ընտանիքը։ Քանի որ շինությունում ապրող ընտանիքների թիվն ու կազմը համընկնում էին այն պատկերին, որը թեորիապես Բեն Լադենի ընտանիքինն էր, ապա Կենտրոնական հետախուզական վարչության վերլուծաբանները  եզրակացրել  են, որ այնտեղ է ապրում  բարձրաստիճան ահաբեկիչը կամ նույն ինքը՝ Բեն Լադենը։