Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել Ֆրանսիայի նախագահ Էմանուել Մակրոնի հետ, որի ընթացքում քննարկվել է Լեռնային Ղարաբաղի շուրջ ստեղծված իրավիճակը: Ինչպես տեղեկացնում է «Արմենպրես»-ը, այս մասին հաղորդագրություն է տարածել Կրեմլի մամուլի ծառայությունը:

«Հաշվի առնելով ԵԱՀԿ Մինսկի խմբում Ռուսաստանի և Ֆրանսիայի համանախագահությունը ՝ հանգամանալից քննարկվել է Լեռնային Ղարաբաղի շուրջ իրավիճակի զարգացումը: Վլադիմիր Պուտինը տեղեկացրել է ռուսական կողմի ձեռնարկած ակտիվ միջնորդական ջանքերի մասին, որոնք թույլ են տվել դադարեցնել արյունահեղությունը եւ խուսափել նոր զոհերից, ինչպես նաև շփման գծի և Լաչինի միջանցքի երկայնքով ռուսական խաղաղապահ զորակազմի տեղակայման մասին»,-ասված է հաղորդագրության մեջ:

Հաղորդագրության մեջ նշված է, որ Ռուսաստանի, Հայաստան և Ադրբեջանի ղեկավարների կողմից նոյեմբերի 9-ին ստորագրված հայտարարությունը կատարվում է, իրավիճակը տարածաշրջանում ընդհանուր առմամբ կայունացել է:

«Պատրաստակամություն հայտնելով համակարգելու ԵԱՀԿ Մինսկի խմբի համանախագահների ՝ Ռուսաստանի, Ֆրանսիայի և ԱՄՆ-ի աշխատանքը ՝ Ռուսաստանի և Ֆրանսիայի ղեկավարները կարևորել են հումանիտար հարցերի անհետաձգելի լուծումը, ներառյալ՝ փախստականների վերադարձը մշտական բնակության վայրեր, բնակչության բնականոն կենսագործունեության համար պայմանների ապահովումը, ենթակառուցվածքների վերականգնումը, քրիստոնեական տաճարների և վանքերի պահպանումը: Այդ կապակցությամբ Ռուսաստանի նախագահը հայտնել է մարդասիրական արձագանքման ռուսական կենտրոնի ստեղծման մասին»,-հաղորդում է Կրեմլի մամուլի ծառայությունը: