Մեկ օր առաջ ՀՀ ԱԺ նախագահ Հովիկ Աբրահամյանը «Facebook»–ի իր էջում գրել էր, որ հանձնարարել է անհարգելի բացակայած պատգամավորների աշխատավարձից պահումներ կատարել։ ՀՀԿ–ական պատգամավոր, Հայաստանի ֆուտբոլի ֆեդերացիայի նախագահ Ռուբեն Հայրապետյանն այսօր լրագրողներին ասել է, որ «Ֆեյսբուք» չի կարդում, չգիտի, թե Հովիկ Աբրահամյանն ինչ է ասել:

–Իսկ եթե խոսքը վերաբերում է ինչ- որ պատժելուն, ես մարդկանց խորհուրդ չեմ տա փորձ անեն ինձ պատժել: Ընդհանրապես խորհուրդ չեմ տա, որ փորձեն վատ բան անեն: Երկրորդ՝ եթե ԱԺ նախագահը որոշի իրոք բացակայությունների համար աշխատավարձը պահել, ես կողջունեմ: ԱԺ նախագահ ա, նա ճիշտ ա, աշխատանքի չես գնացել և, բնականաբար, աշխատավարձ պիտի չստանաս: Եվ ամենկարևորը` ես ԱԺ-ից մինչև հիմա աշխատավարձ չեմ ստացել,–հայտարարել է Ռ. Հայրապետյանը:

Նա նաև ավելացրել է, որ մտադիր չէ առաջադրել իր  թեկնածությունը 2012 թ. խորհրդարանական ընտրություններին:

–Իմ տեղը խորհրդարանում չէ: Ես ծանրաբեռնված եմ ֆուտբոլի գործերով և ժամանակ չունեմ խորհրդարանի աշխատանքների համար: Բայց իմ թեկնածության առաջադրման մասին որոշումը  պիտի կուսակցությունն ընդունի,–ասել է նա:

7or.am