Ռուսաստանի նախագահի մամլո քարտուղար Դմիտրի Պեսկովը բացատրել է, թե ինչու Վլադիմիր Պուտինը դեռ չի շնորհավորել Ջո Բայդենին ԱՄՆ-ի նախագահի ընտրություններում հաղթելու կապակցությամբ:

Ինչպես փոխանցում է РИА Новости-ն, Պեսկովի խոսքով՝ Դոնալդ Թրամփն արդեն հայտարարել է, որ մտադիր է բողոքարկել ընտրությունների ելքը: «Նրա իրավաբանները հայցեր են նախապատրաստել տարբեր նահանգների դատարաններում: Այդ իսկ պատճառով մենք ճիշտ ենք համարում սպասել պաշտոնական հայտարարության»,-ասել է Պեսկովը:

Վերջինս նշել է, որ Թրամփի հաղթանակի պարագայում նախորդ ընտրություններին Կրեմլը պաշտոնապես շնորհավորել էր արդյունքների հայտարարումից հետո, քանի որ բողոքարկման խնդիր չի եղել:

Հիշեցնենք, որ Բայդենի հաղթանակի մասին հայտնել են մի շարք ամերիկյան առաջատար լրատվամիջոցներ, սակայն գործող նախագահը համաձայն չէ հայտարարված արդյունքների հետ:

Աղբյուրը՝ tert.am