«7օր»–ի տեղեկություններով՝ ՀՀ ոստիկանության քննչական գլխավոր վարչության ՀԿԳ ավագ քննիչ Վահան Խանզադյանի գործընկերները մտադիր են նրա դատավարության ժամանակ քաղաքացիական հագուստով գնալ դատարան և ի պաշտպանություն Վահան Խանզադյանի՝ ցույց անցկացնել։

Հիշեցնենք, որ Խանզադյանը որպես կասկածյալ անցնում է ոստիկանության քրեական հետախուզության գլխավոր վարչության նախկին պետ, գեներալ-մայոր Հովհաննես Թամամյանի դեմ հարուցված քրեական գործով: Որպես խափանման միջոց՝ կիրառվել էր երկամսյա կալանքը:

Վերջերս մամուլում լուրեր էին տարածվել, որ ՀՀ ոստիկանության քննչական գլխավոր վարչության քննիչների շրջանում Վահան Խանզադյանի կալանավորումը դժգոհությունն է առաջացրել, որը սպառնում է վերաճել լայնածավալ բողոքի ալիքի։ Խոսվում էր անգամ, թե քննիչները սպառնում են ազատման դիմումներ գրել։

Այս խոսակցություններին անդրադարձել էր ՀՀ ոստիկանապետ Ալիկ Սարգսյանը։ Նա խոստովանել էր, որ Խանզադյանի ձերբակալությունից հետո քննիչները հավաքվել են Հատուկ քննչական ծառայության գլխավոր վարչության պետի սենյակում և իրենց մտահոգությունը հայտնել։

Այդուհանդերձ, Ալիկ Սարգսյանը վստահեցրել էր. «Եվ դրանից տպավորություն ստեղծվեց, որ կարծես դժգոհության արտահայտություն է եղել, նույնիսկ ուզում են հրաժարվել իրենց աշխատանքից և այլն: Սա ուղղակի եղել է սովորական աշխատանքային քննարկում, որը, կարծում եմ, նույնպես բնական էր, որովհետև ձերբակալվել էր նրանց աշխատանքային ընկերը: Բայց երբ որ բացատրեցինք պատճառները, երբ որ հասկացան մարդիկ՝ ինչի մասին է խոսքը։ Նույն պահին ես կապվեցի դատախազի հետ: Պարզեցի նորից ավելի մանրամասներ,  և կարծում եմ՝ նրանք ըմբռնումով մոտեցան, և բոլորը անցել են իրենց աշխատանքին: Այսպիսի նյութ, խոսակցություն, թեմա երբևիցե չի եղել, ինչպես կոչում են հաճախ մամուլում՝ բունտ, հրաժարականներ և այլն»:

7or.am