Վրացի  ռազմական փորձագետ Իրակլի Ալադաշվիլին կարծում է, թե ընդլայնել համագործակցությունը հարևան երկրների հետ, այդ թվում նաև ռազմական ոլորտում, անհրաժեշտ է, բայց միևնույն ժամանակ այս հարցում պետք է հավասարակշռություն պահել։ Այս մասին նա հայտնել է «Ռեգնում» գործակալության թղթակցին՝ մեկնաբանելով Վրաստանի պաշտպանության նախարար Բաչո Ախալայայի Հայասատան կատարած այցը, երևանյան հանդիպուներն ու բանակցությունները։

–Պարզ է, որ Վրաստանն ու Հայաստանը՝ որպես հարևաններ, պետք է զարգացնեն իրենց հարաբերությունները  ինչպես քաղաքական, այնպես էլ այլ՝ այդ թվում նաև ռազմական ոլորտերում։  Նույն կերպ էլ  պետք է հարաբերությունները զարգացնել հարևան Ադրբեջանի հետ։ Չնայած նրան, որ  Հայաստանն ու Ադրբեջանը գտնվում են, կարելի է ասել, սառը պատերազմի մեջ, դադարեցնել համագործակցությունը երկրներից որևէ մեկի հետ չի կարելի։ Միևնույն ժամանակ Հայաստանը Ռուսաստանի հետ  ռազմական ոլորտում պայամանգիր  ունի, իսկ Ռուսաստանն  էլ  գործնականում  Վրաստանի  հետ է սառը  պատերազմի  մեջ, և այս փաստը հայ–վրացական համագործակցության վրա որոշակի հետք է թողնում,–ասել է Ալադաշվիլին։