Դատարանը քննեց Նիկոլ Փաշինյանի հայցն ընդդեմ «Կոշ» ՔԿՀ-ի

● Լրահոս

14.04.2011 ● 18:04

Դատարանը քննեց Նիկոլ Փաշինյանի հայցն ընդդեմ «Կոշ» ՔԿՀ-ի

Այսօր «Արթիկ» ՔԿՀ-ի վարչական շենքում ՀՀ վարչական դատարանը քննեց «Հայկական ժամանակ» օրաթերթի գլխավոր խմբագիր Նիկոլ Փաշինյանի հայցն ընդդեմ «Կոշ» ՔԿՀ-ի: Փաշինյանը դատարանից պահանջում է վերացնել «Կոշ» ՔԿՀ պետի՝ 2010 թ.սեպտեմբերի 28-ին կայացրած որոշումը, համաձայն որի, Նիկոլ Փաշինյանը կարգապահական տույժի է ենթարկվել:

ՀՀ վարչական դատարանն առանց Նիկոլ Փաշինյանի մասնակցության , երկու դատական նիստ է անցկացրել: Վերջին դատական նիստի ժամանակ, ՀՀ վարչական դատարանի դատավոր Ռոբերտ Սարգսյանը բավարարել էր Փաշինյանի միջնորդությունը` հայցադիմումն իր մասնակցությամբ քննելու վերաբերյալ: Այսօրվա նիստի ժամանակ լրագրողների մուտքը ՔԿՀ սահմանափակվել է: Դատավոր Ռոբերտ Սարգսյանը նախապես հրահանգել է տեսախցիկ կամ օպերատոր ներս չթողնել: Դատարանի դահլիճում էլ հրահանգել են անջատել բջջայինները, որպեսզի ոչ մի կերպ հնարավոր չլինի նիստից հատվածներ տեսագրել կամ ձայնագրել:

Բուն դատաքննության ժամանակ Նիկոլ Փաշինյանը ներկայացրել է միջնորդություն՝ փաստաբան ունենալու վերաբերյալ: Այն ընդունվել է ի գիտություն: Խնդիրը սակայն այն է, որ «Հայկական ժամանակ» օրաթերթի գլխավոր խմբագրին հնարավորություն չի տրվում հաղորդակցվել փաստաբանի հետ:

Դատավորը շեշտել է, որ Փաշինյանը իրավունք ունի փաստաբան ունենալու եւ նիստը հետաձգվել է: