«Ժառանգություն» խմբակցության պատգամավորները շրջանառության մեջ են դրել «Զինծառայողների եւ նրանց ընտանիքների անդամների սոցիալական ապահովության մասին», «Պետական կենսաթոշակների մասին» Հայաստանի Հանրապետության օրենքներում փոփոխություն կատարելու մասին օրինագծերի փաթեթը, որի նպատակն է վերստին օրենքով սահմանել կենսաթոշակառու զինծառայողի մահվան դեպքում նրա  հուղարկավորությունը կատարած անձին վճարվող թաղման նպաստը: «Ժառանգության» հեղինակած փաթեթով առաջարկվում է այդ նպաստը սահմանել կենսաթոշակի տասնհինգապատիկի չափով, որn օրենքներում կատարված վերջին փոփոխությունների հետեւանքով առնվազն վեց անգամ նվազեցվել էր:

Մինչ 2010 թվականի հոկտեմբերի 5-ը «Զինծառայողների եւ նրանց ընտանիքների անդամների սոցիալական ապահովության մասին» օրենքի համաձայն` կենսաթոշակառուի մահվան դեպքում նրա ընտանիքին վճարվում էր թաղման նպաստ` կենսաթոշակի տասնհինգապատիկի չափով: Նշված օրենքում կատարված փոփոխությունների արդյունքում Կառավարությանը վերապահվեց կենսաթոշակառուի մահվան դեպքում վճարվող նպաստի չափի սահմանումը: Դրա հիման վրա Կառավարության 2010թ. հոկտեմբերի 10-ի թիվ 1392-Ն որոշմամբ` վերոնշյալ նպաստի չափ սահմանեց 200.000 դրամը:

2010 թվականի դեկտեմբերի 22-ին նշված օրենքում վերստին կատարվեցին փոփոխություններ եւ ուժը կորցրած ճանաչվեցին զինծառայողների թաղման նպաստների վերաբերյալ հատուկ նորմերը: Դրանք վերաամրագրվեցին նույն օրն ընդունված «Պետական կենսաթոշակների մասին» ՀՀ օրենքի 44-րդ հոդվածում: Նույն հոդվածի 7-րդ մասի համաձայն` «Թաղման նպաստի սահմանվող չափը չի կարող պակաս լինել նախկին չափից»: Այդպիսով, օրենքը հստակորեն ամրագրեց թաղման նպաստի չափի նվազեցման արգելքի սկզբունքը, որը գուցեեւ նախկին օրենքում ամրագրված չէր, սակայն ակնհայտ եւ ենթադրելի էր:

Հաշվի չառնելով վերոնշյալ հանգամանքները` Կառավարությունը 2010թ. հոկտեմբերի 21-ի թիվ 1392-Ն որոշմամբ մի քանի անգամ նվազեցրեց նախկինում օրենքով սահմանված գումարի չափը, ինչը հակասում է ,Պետական կենսաթոշակների մասինե ՀՀ օրենքի 44-րդ հոդվածի 7-րդ մասի պահանջներին:

Արդյունքում ստացվում է, որ մեր պետականության կայացման հարցում մեծ ավանդ ունեցող զինծառայողների համար Կառավարությունը ոչ միայն արժանավայել կյանք, այլեւ արժանապատիվ թաղում չի կարողանում ապահովել: Ուստի, «Ժառանգություն» կուսակցության պատգամավորների օրենսդրական նախաձեռնության նպատակը մեր երկրի պաշտպանների մահից հետո նրանց ընտանիքների նվազագույն պաշտպանվածության երաշխավորումն է իբրեւ պետության տարրական պարտքի դրսևորում: