Բելառուսի նախագահի ընդդիմադիր թեկնածու Սվետլանա Տիխանովսկայայի վստահված անձ Օլգա Կովալկովան, մեկնաբանելով իշխանափոխությունից հետո Բելառուսի նախագահ Ալեքսանդր Լուկաշենկոյի նկատմամբ քրեական հետապնդման հնարավորությունը, հայտարարել է, որ եթե հանցագործություն է կատարվել, ապա դրանից ոչ մի մարդ ապահովագրված չէ, գրում է ria.ru-ն։

«Եթե մարդը հանցագործություն է կատարել, և նրա մեղքն ապացուցված է, նա պետք է քրեական պատասխանատվության ենթարկվի։ Դա գործում է բոլորի համար՝ անկախ նրանից՝ նախագահ ես, թե հասարակ քաղաքացի։ Այդ պատճառով, եթե ապացուցվի ցանկացածի մեղավորությունը, և բացահայտվի, որ նա հանցագործություն է կատարել, ապա նա պետք է պատասխանատվություն կրի»,-ասել է նա «Էխո Մոսկվի»-ի եթերում։

«Ոչ մի մարդ ապահովագրված չէ քրեական հետապնդումից, եթե հանցագործություն է կատարել»,-ընդգծել է նա:

Ըստ Բելառուսի Հանրապետությունում առկա օրենքի՝ երկրի նախագահն անձեռնմխելիություն ունի։

Հիշեցնենք, որ Բելառուսում օգոստոսի 9-ին տեղի ունեցած նախագահական ընտրություններից հետո երկրում շարունակվում են բողոքի ցույցերն ու գործադուլները: Առաջին օրերին ուժայիններն ակտիվիստների դեմ ուժ ու հատուկ միջոցներ էին կիրառել։ Ձերբակալվել է մոտ 6,7 հազար մարդ։ Բելառուսի Գլխավոր դատախազության տվյալներով՝ մեկուսարաններում մնում է 130-ից պակաս մարդ, մնացածն ազատ են արձակվել։

Պաշտոնապես հաստատվել է երկու մարդու մահը։ Իրավապաշտպանները հայտնում են հինգ զոհի մասին։

Աղբյուրը՝ tert.am