Վերջերս որոշ թերթեր ու կայքեր դատի տրվեցին ներկայիս ու նախկին պաշտոնյաների կողմից։ Մեկնաբանելով «մամուլի դեմ սկսված արշավը»` ՀՀԿ–ական պատգամավոր Գագիկ Մելիքյանն ասել է, թե այն կարծիքին է, որ լրատվությունը չպետք է որևէ մեկի նկատմամբ սուտ ու զրպարտչական տեղեկություններ հրապարակի.

–Ես կողմնակից եմ ազատ խոսքին՝ ավելի կոռեկտ շրջանակներում,–ընդգծել է նա։

Մարտ ամսին ՀՀԿ–ական պատգամավոր Տիգրան Արզաքանցյանը «Երկիր» թերթին դատի էր տվել «131 դեմք ու դիմակ» խորագրով բաժնում իր մասին տպագրված հոդվածի համար, իսկ դատավարության ժամանակ նշել է, թե վիրավորվել է, որ իրեն «ստիլյագ» են անվանել ու որ ինքը «Վոլոչկովային Հայաստան է տարել–բերել»։

«Արդյոք «ստիլյագ» բնորոշումից կարելի՞ է վիրավորվել, երբ շատ ավելի վիրավորական բաներ կային» հարցին ի պատասխան՝ Գ. Մելիքյանն ասել է.

–Կարող է՝ այդ մեկն է հասկացել, դա է ասել։

Իսկ անդրադառնալով «Վոլոչկովային տանել–բերել» արտահայտությանը՝ զարմացել է.

– Վոլոչկովային տանել–բերելը վիրավորակա՞ն է։

7or.am