«Մեր ռազմավարական ներդրողը Մեծ Բրիտանիան է: Առաջ մենք այդ հարաբերությունները վերլուծում և դրանց նայում էինք նաև Եվրոպական միության պրիզմայով: Սակայն այսօր Մեծ Բրիտանիան այլևս Եվրամիության անդամ չէ, մեր փոխադարձ հետաքրքրությունը միմյանց նկատմամբ օրեցօր աճում է»,-հայտարարել է Ադրբեջանի նախագահը:

Ալիևի խոսքով` բրիտանական British Petroleum ընկերությունը հանդիսանում է Ադրբեջանի ռազմավարական գործընկերը:

«Անցյալ տարի մենք նշեցինք համագործակցության 25-ամյակը, և դեռ կհամագործակցենք ամենաքիչը 25-30 տարի: Իհարկե, դա դրական կերպով է ազդել երկկողմ հարաբերությունների վրա, բայց երկու կողմերի կարծիքն էլ այն է, որ մենք պետք է ավելի շատ աշխատենք ոչ նավթային ոլորտում: Այդ կապերն էլ մեզ համար շատ կարևոր են»,-ասել է Ալիևը:

«Մեր դիվանագիտությունը պետք է հարձակողական լինի, պետք է ամբողջովին ապահովել ազգային շահերը: Բայց հաճախ մենք հակառակն ենք տեսնում: Տեսնում ենք, որ որպես հիմք վերցվում է համաձայնելու սկզբունքը, ջանքեր են ներդրվում ազգային շահերը մի կողմ դնելով ինչ-որ մեկին դուր գալու ուղղությամբ: Ես բավականին տեղեկացված եմ այդ մասին: Այդ իսկ պատճառով, պահեք այս հարցերը տեսադաշտում»,-դիմել է Ալիևը նորանշանակ նախարարին:

Ադրբեջանի նախագահի խոսքով՝ իրենց երկրին հարկավոր են «պրոֆեսիոնալ դիվանագիտական կադրեր, որոնք ունենան ազգային ոգի, կապված լինեն ազգային արժեքների հետ և կարողանան պաշտպանել երկիրը»:

«Ինչ վերաբերում է արտաքին քաղաքականության մեջ մեր առաջնահերթություններին, ապա դրանց մասին ես շատ եմ ասել հասարակությանը: Այսօր ևս մեկ անգամ ցանկանում եմ ասել: Դուք, որպես նոր նախարար, պետք է դա լսեք ինձնից, պետք է լսի նաև ադրբեջանական հասարակությունը: Հարևան երկրների հետ հարաբերությունները մեզ համար առաջնահերթություն են: Դրանք կառուցված են շատ առողջ հիմքի վրա: Կյանքն ու իրադարձությունների ընթացքը ցույց են տալիս, որ սա շատ ճիշտ քաղաքականություն է: Հարևան երկրների քաղաքականությունն Ադրբեջանի նկատմամբ նույնպես շատ դրական է: Մենք այդ հարաբերությունները կառուցել ենք բարեկամության և լավ հարևանության հիմքի վրա: Այդպիսով՝ ոչ մի հարևան երկրի հետ, բնականաբար բացառությամբ Հայաստանի, մենք ոչ մի խնդիր չունենք: Անցյալում եղած խնդիրները լուծվել են»,-ասել է Ալիևը:

Ադրբեջանի նախագահ Իլհամ Ալիևը նորանշանակ արտգործնախարար Ջեյհուն Բայրամովի հետ հանդիպման ժամանակ դժգոհություն է հայտնել երկրի դիվանագիտական ներկայացուցչությունների աշխատանքից` նշելով, որ «որոշ դիվանագետներ դավաճանել են երկիրը»: