«Ֆեյսբուքում» գրող, բլոգեր Դօրիանը «Շնորհավորում ենք մշակութային գործիչներին ստացած բնակարանների կապակցությամբ» նախաձեռնություն է կազմակերպել։ Վերջինին արդեն 76 օգտատեր է միացել։ Նախաձեռնության անդամները շնորհավորում են հայ մշակութային գործիչներին՝ «Տաշիր–2011»-ում ստացած բնակարանների կապակցությամբ և շնորհակալություն հայտնում նրանցից ոմանց, մեր ժողովրդին ու երկիրն արժանապատվորեն ներկայացնելու համար:

«Հուսով ենք, որ նման գնահատականի կարժանանան նաև մեր իրական երգարվեսը ներկայացնող բոլոր այն մարդիկ, ում անուններն այս անգամ մրցանակաբաշխության ժամանակ չհնչեցին: Ինչպես նաև կոչ ենք անում հայազգի գործարարներին ֆինանսական աջակցություն ցուցաբերել նաև Հայաստանում ծայրահեղ աղքատության մեջ ապրող ընտանիքներին, որոնք, գուցե ոչին չեն արել ազգի ու հայրենիքի համար, բայց չեն դադարում մարդ մնալ և, ինչպես յուրաքանչյուրս՝ աստղ, թե բանվոր, ունեն մարդավարի ապրելու իրավունք»,–ասված է նախաձեռնության հայտարարության մեջ։

Նշենք, որ «Տաշիր–2011» մրցանակաբաշխությունից անմիջապես հետո «Ֆեյսբուքում» «ԿՈՉ «Տաշիր-2011»-ի աստղերին, ոչ թե պահանջ, այլ առաջարկ» նախաձեռնություն էր սկսվել, որի մոտ 3 հազար անդամներն առաջարկում են մեր աստղերին (ով տան կարիք չունի) «Տաշիր-2011»-ից նվեր ստացած բնակարանները նվիրաբերել անտուն ընտանիքներին:

7or.am