«Ռոյթերս» գործակալությունը տեղեկացնում է, որ միջազգային հանրության կողմից ճանաչված Կոտ դ’Իվուարի նախագահ Ալսան Ուատարայի ուժերը այս գիշեր գրավել են Աբիջան քաղաքում գտնվող իր պաշտոնը զիջել չցանկացող, ինքնահռչակ նախագահ Լորան Գբագբոյի նստավայրը ։

Ինչպես փոխանցում է «ՌԻԱ նովոստի»–ն՝ Ուատարայի ներկայացուցիչ Պատրիկ Աչիի խոսքերով՝ հայտնի չէ, թե այն գրավելու ժամանակ Գբագբոն արդյոք եղել է իր նստավայրում։

Աբիջանում արդեն մի քանի օր է շարունակվում են կատաղի մարտեր ընթանալ Լորան Գբագբոյի ու Ուատարայի ուժերի միջև։ Հիշեցնենք, որ վերջինս 2010թ–ի դեկտեմմբերին հաղթել է նախագահական ընտրություններում։

Կոտ դ’Իվուարը հակամարտության մեջ է նախագահական ընտրությունների երկրորդ փուլից հետո, երբ Գբաբոն հրաժարվել է իշխանությունը զիջել իր հակառակորդ Ուատարիին, որի օրինականությունը ճանաչել է ՄԱԿ–ը։ Նախօրեին Կոտ դ’Իվուարի օդային տարածությունն ու սահմանները ժամանակավորապես փակվեցին՝ պայմանավորված նախագահական ընտրություններից հետո քաղաքական հուզումների համապատկերին թեժացած իրադրությամբ։