ՀՀ Ազգային ժողովում «Հայաստանի Հանրապետության գազամատակարարման համակարգի գործունեության ուսումնասիրության Ազգային ժողովի ժամանակավոր հանձնաժողով ստեղծելու մասին» թեմայով լսումների ընդմիջման ընթացքում ՀՀ էներգետիկայի նախարար Արմեն Մովսիսյանը պատասխանել է լրագրողների հարցերին։

–Ազգային ժողովում նման ժամանակավոր հանձնաժողով ստեղծելը, որ առաջարկում է ՀՅԴ–ն, Ձեր կարծիքով կխանգարի՞ էներգետիկայի ոլորտին։

–Ինչպես տեսնում եք քննարկումներից, ամեն ինչ շատ պարզ է, շատ ակնհայտ, շատ թափանցիկ և կարիք չկա հանձնաժողով ստեղծելու։ Մի բան, որ պարզ ու ակնհայտ է, ի՞նչ հանձնաժողովի մասին կարող է խոսք լինել։ Հանձնաժողովը պետք է ինչ–որ մի առաքելություն , ինչ–որ մի գործառույթ ունենա։ Չեմ կարծում, որ դրա անհրաժեշտությունը կա։ Բոլոր հարցերին պատասխան է տրվում, բոլորը բաց դրված են տարբեր կայքերում, կան հաշվետվություններ։ Այնպես չէ, որ ինչ–որ բան փակ է այստեղ։

–Իսկ այն, որ մենաշնորհ է «Հայռուսգազարդը» և օրենքով պետք է կարգավորվեն գները…

–Հենց այն, որ արդեն հանրային ծառայությունները կարգավորող հանձնաժողովն է կարգավորում բնական գազի սակագինը, այլ ոչ թե ինքը ընկերությունը, արդեն իսկ հակամենաշնորհային օրենքի դրույթներից է։ Ընկերությունը չի սահմանում գները, դա անում է անկախ մարմինը։

–Այդ դեպքում ինչո՞ւ է Դաշնակցությունն ուզում, որ հանձնաժողով լինի։

–Քննարկումները կավարտենք պարզ կլինի։

–Ձեր համար պա՞րզ է, թե՞ ինչ ժամկետներում գազի սակագներն անփոփոխ կմնան։

–Համենայն դեպս մինչև տարեվերջ սակագները չեն փոխվի, մինչև հաջորդ ապրիլի 1–ը։

–Իսկ ձեր կարծիքով դրա մեջ քաղաքական խնդիր կա՞ր։

–Բնականաբար սրա մեջ կար և՛ քաղաքական, և՛ տնտեսական։ Բոլոր բաղադրիչները հաշվի են առնված։ Եթե խնդիրն արդեն նախագահի մակարդակով է քննարկվել և նախագահն է հասել այդ հաջողության, բնական է, երկու ընկերությունները չեն, որ եկել են ընդհանուր հայտարարի։ Դա նախագահի բանակցությունների արդյունքում է տեղի ունեցել։

–Կա մի այսպիսի տեսակետ, որ Հայաստանն իր էներգետիկ բոլոր ռեսուրսները ժամանակին Ռուսաստանին է տվել և այս գազի հետ կապված պայմանավորվածությունների արդյուքնում Ռուսաստանն առանձնապես մեծ բան չի կորցնում։ Համաձա՞յն եք։

–Ո՛չ, համաձայն չեմ։ Հայաստանի էներգետիկ համակարգը ամենաանկախ համակարգերից մեկն է։ Եթե լավ ուսումնասիրեք մեր օրենքները, մեր հնարավորությունները, կտեսնեք, որ ամենաանկախ համակարգերից մեկն է, համենայն դեպս շատ ավելի անկախ, քան տարածաշրջանի որևիցե երկրի։

–Պարոն Մովսիսյան, օրինակ գազի կալորիկանության հետ կապված բողոքները շատ են։ Այդ հարցով պատասխան չպե՞տք է տրվի։

–Բնականաբար ժամանակ առ ժամանակ բոլոր առաջացող հարցերին պետք է պատասխան տրվի. և՛ կալորիականության հետ կապվա,ծ և՛ տարածված այն թյուր կարծիքին, որ գազի հետ օդ են փչում։ Կարող են մտածել և չիմանան էլ, որ գազի հետ եթե օդ լինի, ապա դա նշանակում է, որ ամբողջ համակարգը կպայթի։ Պետք է ուղղակի պարբերաբար… միգուցե այստեղ Հայռուսգազարդը թերացել է, պետք է ավելի շատ բացատրական աշխատանք տաներ, բայց որ պետք է կատարվի, դա ակնհայտ է։

–Հայռուսգազարդը չի անում, ո՞վ պետք է անի։

–Արվում է։ Այնպես չի որ ոչինչ չի արվում։ Հիշեք, թե տարիներ առաջ ինչքան վթար էինք ունենում և ինչքան զոհեր, ընտանքիներով զոհվում էին։ Վերջին տարիներին նման ճչացող վթարներ չկան։ Ներտնային համակարգի սպասարկման էլեկտրոնային մեթոդի անցումը բերեց դրան։ Ես չեմ ասում, որ կատարյալ է, ամեն ինչ արված է։ Այլ հարց է, թե որքա՞ն լավ է այսօր այդ համակարգն աշխատում, կարո՞ղ է ավելի լավ աշխատել։ Օրինակ՝ ես գտնում եմ, որ այո՛, և պետք է այստեղ աշխատանք տանել, որ սպասարկումն ավելի լավ կատարվի։

–Խոշոր սպառողներին մատակարարվող գազի կալորիականությունը միշտ վերահսկողության տակ է, իսկ բնակչությանը՝ ոչ։

–Հանրապետություն մտնող ամբողջ գազի կալորիականությունն է մոնիթորինգի տակ, ուղղակի խոշոր սպառողներն այդ հնարավորությունն ունեն։։ Մինչ այսօր որևէ խնդիր, որևէ սպառողի կողմից չի եղել։

Ներկայացրեց Արփի Բեգլարյանը