Ինչպես հաղորդում է «Agence France-Presse» գործակալությունը, Իտալիայի վարչապետ Սիլվիո Բեռլուսկոնիի փաստաբանները դերասան Ջորջ Քլունիին խնդրել են դատարանում որպես վկա հանդես գալ անչափահասների հետ քաղաքական գործչի սեռկան հարաբերություններ ունենալու մասին դատական գործում։

Փաստաբանների հաղորդած տվյալների համաձայն՝ Քլունին և  նրա ընկերուհին՝ իտալացի մոդել Էլիզաբեթ Կանալիսը, ներկա են եղել այն երեկույթներին, որի ժամանակ 74–ամյա քաղաքական գործիչը, ինչպես ենթադրվում է, օրգիաներ  էր կազմակերպել մարմնավաճառների հետ։

Այն մասին, որ Քլունին և Կանալիսը այդ երեկույթներին ներկա են եղել, պատմել է Մարոկկոյից պարուհի Կարիմա Էլ–Մարուգը (հայտնի Ռուբի անունով)։ Նա Բեռլուսկոնիի գործով գլխավոր մեղադրող վկան է։

Անձամբ Քլունին հայտարարել է, թե  վարչապետի փաստաբանների որոշումը տարօրինակ է համարում։

«TMZ» գործակալությունը  հայտնում է, թե դերասանը հայտարարել է, որ Բելռուսկոնիի հետ ընդամենը  մեկ անգամ է հանդիպել, այն էլ Դարֆուրին օժանդակություն ցույց տալու միջոցառման ժամանակ։