Ինչպես հաղորդում է «Ինտերֆաքս» գործակալությունը, «Լևադա–կենտրոն» հետազոտական ընկերության մարտի 18–22–ին անցկացրած հարցումները ցույց են տվել, որ նախագահ Դմիտրի Մեդվեդևի և վարչապետ Վլադիմիր Պուտինի նկատմամբ ռուսների վստահությունը, համեմատած անցած տարվա տվյալների հետ, նվազել է 10%–ով։

Հետազոտությունների արդյունքներով՝ 2011թ. մարտին ռուսների կողմից ամենավստահելի քաղաքական գործիչների թվում նշված Մեդվեդևին և Պուտինին մատնացույց է արել հարցվածների համապատասխանաբար 34%–ը և 39%–ը, իսկ 2010թ. այն համապատասխանաբար եղել է  43% և  50%։

2011թ նախագահի պաշտոնում Մեդվեդևի գործունեությունը դրական են գնահատել հարցվողների 66%–ը՝ նախորդ տարվա 75%–ի փոխարեն։  Իր պաշտոնում Պուտինի աշխատանքը դրական է գնահատել մարդկանց  68%–ը, այն դեպքում, երբ անցած տարի այդ թիվը կազմում էր  78%։

–Սա վարկանիշի ամենախոր անկումն է՝ սկսած  2005թ. հուլիսից,–«Ռոյթերս» գործակալությանն ասել է «Լևադա–կենտրոնի» փոխտնօրեն Ալեքսեյ Գրաժդանկինը։

Կառավարության աշխատանքը դրական գնհատող մարդկանց թիվն անցած տարվա մարտից այս տրվա մարտը նվազել է՝ 55%–ից հասնելով 48%–ի։  34%–ից 42–%–ի է հասել այն մարդկանց թիվը, ովքեր կարծում են, որ  երկիրը գնում է ոչ ճիշտ ճանապարհով։