Քիչ առաջ Արտակարգ իրավիճակների նախարարության փրկարար ծառայության Սևանի ջրափրկարարները՝ Արմեն Ճզմաչյանի գլխավորությամբ, որոնողական աշխատանքներ կատարելու արդյունքում հայտնաբերեցին Աղստև գետն ընկած ВАЗ 21015 մակնիշի ավտոմեքենայի գտնվելու վայրը:

Ինչպես դեպքի վայրից հայտնում է ֆոտոլրագրող Գագիկ Շամշյանը, Ա. Ճզմաչյանը, սուզվելով վարար գետի մեջ, կարողացավ հատուկ ճոպաններ ամրացնել ավտոմեքենայի որոշ հատվածներում և վերամբարձ կռունկը ավտոմեքենան դուրս բերեց գետից:

Ավտոմեքենայի մեջ հայտնաբերվել է վարորդի՝ Հաղարծին գյուղի բնակիչ, 41-ամյա Ժիրայր Աղաջանյանի դին:

Որոնողական աշխատանքները սկսվում էին առավոտյան 06:10-ից և ավարտվում 21:00-ին ու այն ձգվում էր 20 կմ: Փաստի առթիվ հարուցվել է քրեական գործ՝ ՀՀ քր օր-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշներով:

Քննիչի հանձնարարականով ավտոմեքենան վերամբարձ կռունկի ու քարշակի միջոցով տեղափոխվեց ոստիկանության Դիլիջանի բաժնի պահպանվող հատուկ տարածք:

Ինչպես ավելի վաղ դեպքի վայրից հայտնել էր ֆոտոլրագրողը, մայիսի 10-ին Արտակարգ իրավիճակների նախարարության Փրկարար ծառայության Տավուշի մարզային փրկարարական վարչության և նույն վարչության Դիլիջանի և Իջևանի հրշեջ-փրկարարները՝ փրկարարական վարչության օպերատիվ խմբի ծառայողները, առավոտյան ժամը 06:10-ից վերսկսել էին Հաղարծին գյուղի բնակիչ, 41-ամյա Ժ.Ա.-ի որոնողական աշխատանքները:

Մայիսի 9-ից, ոստիկանության Տավուշի մարզային վարչության, ոստիկանության Դիլիջանի բաժնի, համայնքային ոստիկանության բաժանմունքի ծառայողները՝ մարզի հրշեջ-փրկարարների հետ, գրեթե Հաղարծին գյուղի ողջ բնակիչների, ինչպես նաև Դիլիջանի քաղաքապետարանի աշխատակիցների հետ, որոնում էին նրան, քանի որ տեղեկություններ էին ստացվել, որ Ժ.Ա.-ն ՎԱԶ-21015 մակնիշի ավտոմեքենայով Երևան-Իջևան ավտոճանապարհի Հաղարծին գյուղի վարչական տարածքում դուրս է եկել ճանապարհի երթևեկելի գոտուց և ընկել Աղստև գետը:

Ֆոտոլրագրողը հայտնում էր, որ որոնողական աշխատանքները տևել են ժամեր շարունակ, և փրկարարները, ոստիկաններն ու քաղաքացիները մոտ 20 կիլոմետր երկարությամբ գետում կատարել են որոնողական աշխատանքներ, սակայն արդյունքի չեն հասել:

Գետի հունը այնքան վարար էր, որ մարդիկ նույնիսկ չէին կարողանում նրա վրայով անցնել:

Մանրամասները՝ Shamshyan.com-ում: