Ինչպես արդեն հայտնի է, մարտի 20-ին Արմավիրում տեղի ունեցած քաղաքապետի ընտրությունների դեմ բողոքող արմավիրցիները փակել էին Արմավիր-Երևան ճամապարհը: Ընտրությունների արդյունքում Արմավիրի քաղաքապետ է վերընտրվել գործող քաղաքապետ, հանրապետական Ռուբեն Խլղաթյանը: Նրա մրցակիցը ավագանու խորհրդի անդամ,  անկուսակցական Սևակ Մինասյանն էր:

Բողոքի գործողության մասնակիցները պահանջում էին անվավեր ճանաչել Խլղաթյանի հաղթանակը, քանի որ ընտրությունները տեղի են ունեցել բազմաթիվ ընտրախախտումներով ու կեղծիքներով:

ՀՀ Ազգային ժողովի պատգամավոր Ռուստամ Գասպարյանը, ով ծնունդովԱրմավիրի մարզի Ջանֆիդա գյուղից է, սխալ է համարում ճանապարհ փակելը:

-Ես Արմավիրում հայտարարություն եմ արել, որ չեմ խառնվելու ընտրություններին, քանի որ չենք ունեցել մեր թեկնածուն: Ինչքան գիտեմ, այնտեղ ընտրությունների ընթացքում արձանագրություններ չեն կազմվել հանձնաժողովի կամ վստահված անձանց կողմից: Բայց եթե խախտումներ էլ կային, ճանապարհ փակելը շատ սխալ եմ համարում, որովհետև հազար ու մի տեսակ դեպքեր են պատահում` հիվանդություն, շտապ դեպքեր: Իսկ եթե բողոքի առիթներ կային, ապա կարող էին մարզպետարանի կամ նախագահականի դիմաց իրենց բողոքի գործողությունն անեին,-«7օր»-ին ասել է Ռ. Գասպարյանը:

Նա նաև նշել է, որ միայն զրույցներից է տեղյակ, որ ընտրատարածքից դուրս ընտրակաշառք է բաժանվել, բայց տեղամասերում ընդհանուր առմամաբ նորմալ են ընթացել ընտրությունները:

7or.am