ՀՀ ԱԺ ՀՅԴ խմբակցության ղեկավար Վահան Հովհաննիսյանը Հրայր Թովմասյանից ցանկացել է իմանալ արդյոք նրա համար էլ է ընտրացուցակների հրապարակումը գաղտնիության սկզբունքի խախտում, քանի որ գաղտնի է ոչ թե քվեարկության փաստը, այլ այն թե ում է  քվեարկում քաղաքացին:

«Ինչու՞ է  կառավարությունը դեմ ընտրացուցակները հաջորդ օրը հրապարակելուն, միգուցե, որովհետև ժողովուրդը կիմանա, որ քվերակել են 58 հազար վաղուց մեռած թոշակառունե՞ր, որոնք նաև թոշակ են ստանում»,- հարց է ուղղել Վահան Հովհաննիսյանը:

Ի պատասխան արդարադատության նախարարը նշել է, որ ժամանակակից եվրոպական տենդենցներն արդեն խոսում են այն մասին, որ մասնակցության գաղտնիությունը ևս դիտարկվում է որպես պաշտանության մեխանիզմ, ինչը սակայն բացարձակ չէ.

-Եվրոպական այսօրվա ստանդարտները խոսում են այն մասին, որ գաղտնիության այս չպահպանումը խնդիր չի առաջացնում, խնդիր է առաջացնում, երբ ցուցակները հրապարակվում են,- նշել է Հ.Թովմասյանը:

Նա նշել է, որ եթե խոսքը 58 հազարի մասին է, ապա այո, հնարավոր է լուծման ճանապարհները ընտրողների պատշաճ ցուցակներ ունենալու մեջ է, որ այդ խնդիրներն այլևս չառաջանան և լինեն վերահսկման այլ մեխանիզմներ, ինչպես օրինակ, վստահված անձի «կողքը նստելը»: Նախարարը, սակայն, իր խոսքում չի նշել, թե վստահված անձը ում կողքին պետք է նստի: Այս կապակցությամբ Վահան Հովհաննիսյանը ռեպլիկ է բաց թողել.

-Մեռածի՞ կողքը նստած լինելը:

Սա բավական նյարդայնացրել է արդարադատության նախարարին և նա պատասխանել է.

-Եթե ձեր համար հնարավոր է մեռածի կողքը նստած լինելը ընտրության ժամանակ, ուրեմն՝ մեռածի, և պետք չէ այդպես իրոնիայով բաներ ասել: Հասկանալի չէ՞, որ հանձնաժողովի անդամի կողքը:

Արձագանքելով Վահան Հովհաննիսյանը նախարարին խնդրել է չնյարդանալ.

-Մենք իրավունք ունենք ցանկացած հարց տալ և իրոնիայի ցանկացած աստիճանով:

7or.am