Սահմանադական դատարանում նախագահի դիմումի հիման վրա վիճարկվում են մի շարք դրույթներ, որի ընթացքում ՍԴ դատավոր Ֆելիքս Թոխյանը հարց ուղղեց պատասխանող կողմ ԱԺ ներկայացուցչին՝ Իրավական ապահովման և սպասարկման բաժնի պետ Կարեն Մովսիսյանին՝ ԱԺ-ն սահմանադրական պատասխանատվություն կրո՞ւմ է, որ իր սահմանադրական պարտավորությունները չի կատարում: Մովսիսյանը պատասխանեց. «Իհարկե կրում է»:

Ֆելիքս Թոխյանն ասաց. «Հիմա ԲԴԽ անդամներին չեք նշանակում, Վերաքննիչ պալատի անդամին չեք նշանակում, երկիրն ի՞նչ է անելու, եթե դուք ձեր գործը չեք անում»:

«Ազգային ժողովն իր գործը շարունակում է կատարել, դրա համար էլ Սահմանադրության մեջ նախատեսված է մի դրույթ, որն այսօր վիճարկվում է՝ դա 138-րդ հոդվածն է: Եթե որոշ դեպքերում անհնարինությունից ելնելով, ոչ համաձայնության գալով, հնարավոր չի եղել ընտրել սահմանադրական մարմին, ապա նախագահին է տրված լիազորություն ժամանակավոր տալ այդ հարցի լուծումը, մինչև կգան ընդհանուր հայտարարի: Ազգային ժողովը կոլեկտիվ է որոշումներ կայացնում»,-ասաց Մովսիսյանը, ում ընդհատեց ՍԴ դատավոր Ֆելիքս Թոխյանը:

«Թողնենք մի կողմ պարոն նախագահին, ես շատ լավ հասկանում եմ, թե ինչու չի նշանակում պարոն նախագահը: Ես մի խորհուրդ տամ Ձեզ՝ լավ իմաստով. կան երկրներ, երբ պաշտոններին չեն կարող նշանակում անել, իրենք մտցնում են դրույթ, որով նախկին պաշտոնավարողին աշխատանքից չեն ազատում մինչև նորին չի նշանակում: Ես սա ուղղակի հուշում եմ»,-ասաց Թոխյանը:

Աղբյուրը՝ Tert.am