ՀՀ  Նախագահի  նստավայր

Պարոն  Ս. Սարգսյանին

Խորհուրդ նախկին գործընկերոջս ծաղկաձորյան «կաբինետի» կապակցությամբ

Հարգելի  Սերժ  Ազատի,

կարծում  եմ, ճիշտ  չէ, որ  «կաբինետային  աշխատանքն», ինչպես  ինքդ  ես ձևակերպում  ծաղկաձորյան միջոցառման կարգավիճակը, այդպես  շքեղ  ցուցադրել հասարակությանը:

Ավելին`վերջինիս  համար այս  ծանր  պայմաններում, պետության կառավարման   ծախսերը  կրճատելու  փոխարեն, անթույլատրելի  միջոցներ  ես  վատնում, այդ թվում, նման  միջոցառումներ  անցկացնում  հանգստյան  վայրերում:

Դու  պետք  է  հաշվի  առնես, որ  օրինակիդ հետևելու  ցանկացողներ  շատ  կան:

Չնայած, նման ուղղվածություն  արդեն  ունեն ՀՀԿ–ական  գործընկերներդ, որոնք  հաճախ են «ճգնաժամը վայելում»  նույն  Ծաղկաձորում: Սակայն, մտահոգությունս  միայն  դա  չէ:

Ելույթումդ հնչել  են  միայն  հայտնի  ճշմարտություններ  կամ  արձանագրվել  փաստեր  և խոսք  չկա, այդ  թվում, ինքնաքննադատություն,  իրական  պատճառների մասին, մասնավորապես`

1. Երկրի  անվտանգությանն առնչվող  «Երևանում Հայաստանի  բնակչության կենտրոնացման»  և  «չմշակվող մեծ հողատարածքների» խնդիրների  մասին: Չէ  որ Դու  ես  երկար  տարիներ  եղել  ԱԱԽ  քարտուղարը, Վարչապետը և արդեն  4-րդ տարին  է իրականացնում  ես  ՀՀ  Նախագահի  լիազորությունները,

2. Գինու  գործարանի  սեփականատեր ԱԽՔ-ի  կողմից գյուղնախարարների  առաջարկման /նշանակման/ մասին, այն  էլ` առանց  որևէ պատասխանատվության,  կամ,  հիշյալ գործարանի, և ընդհանրապես  բարձրաստիճան  պաշտոնյաների  բիզնեսների  ծաղկման, ի հակառակ  գյուղատնտեսության  անկման  մասին,

3. Իշխող  կուսակցությաւն  կողմից  իր  նախընտրական  ծրագրի չկատարման  և  այլնի մասին:

Հավանաբար, սա  հետևանք  է  նաև, այն  բանի, որ  նախընտրական  ծրագրումդ  որևէ ակնարկ  չկա  անգամ  գյուղատնտեսության  մասին: Չնայած, ես  նույնպես  համաձայն եմ, որ  Հայաստանն  ուժեղ  ժողովրդավարական  պետության  բնութագրման, ցավոք չիրականացված,  խոստումդ  ավելի  կարևոր  է:   Այդ  կապակցությամբ, խորհուրդ  եմ  տալիս  հաջորդ  նման  միջոցառումը  նվիրել հենց  այդ  խոստման  չկատարման  պատճառներին, այդ  թվում, 2008թ.-ի  ապօրինի ընտրությունների  հետևանքների  չվերացմանը, «մարտի  1-ի»  դեպքերի  չբացահայտմանը, քաղբանտարկյալների  առկայությանը  և  այդ  ուղղությամբ  ԵԽԽՎ  համապատասխան որոշումների  չկատարմանը:

ՀՀ Գերագույն խորհրդի պատգամավոր Ռ. Թորոսյան