Կողմնակից եմ երիտասարդներին, մեր արժանի փոխարինողներն են, բայց 25 տարեկանը չի կարող մարդու ճակատագիրը որոշել, լրագրողների հետ ճեպազրույցում ասաց ԲՀԿ առաջնորդ Գագիկ Ծառուկյանն՝ անդրադառնալով դատավորների թեկնածուների տարիքային շեմը 28-ից 25 իջեցնելուն:

«25 տարեկանից թող լինեն դատավորներ, բայց տնտեսական հարցերով, փաստաթղթերի հարցերով, բայց մարդու ճակատագիրը որոշելու համար 35 տարեկանից ոչ պակաս պիտի լինի»,-ասաց նա:

Ծառուկյանը կոչ արեց միջազգային փորձն ուսումնասիրել, որտեղ ևս տարիքային շեմը բարձր է:

«Մենք վերևից աստղեր չեն իջեցնում, իրականությունն է: Ուզում են բան փոխել, թող միջազգային նորմերից օգտվեն՝ Ամերիկայի, Անգլիայի պես երկրներից»,-ասաց նա:

Հիշեցնենք, որ «ՀՀ դատական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթով առաջարկվում է փոփոխել էթիկայի և կարգապահական հանձնաժողովի անդամների թիվը ու կազմը, ինչպես նաև իջեցվել է դատավորների թեկնածուների տարիքային շեմը` 28-ից 25: Նախագծերի փաթեթով սահմանվել են նաև դատավորների թեկնածուների ընտրության նոր մեխանիզմներ՝ վերացվել է դատարանի նախագահի նշանակման համար անհրաժեշտ տվյալ դատարանում դատավորի փորձառություն ունենալու պահանջը:

Աղբյուրը՝ aysor.am