Այսօր «Հայաստանի տնտեսությունը. հայացք դրսից» թեմայով քննարկման ժամանակ Արժույթի միջազգային հիմնադրամի երևանյան գրասենյակի ղեկավար Գիլերմո Տոլոսան նշել է, որ Հայաստանի տնտեսության առջև այսօր ծառացած են երկու տիպի խնդիրներ՝ կառուցվածքային և ինքնաբերաբար ծագող։ «Հայաստանի տնտեսության զարգացման համար խոչընդոտներ են առաջացել ոչ միայն համաշխարհային ֆինանսատնտեսական ճգնաժամի ժամանակ, այլ նաև դրանից առաջ և հետո։ Հայաստանի Հանրապետությունն ավելի կշահի, եթե հավասար հնարավորություններ ընձեռվեն բոլորին, և ոչ թե հարստությունը կուտակվի որոշ մարդկանց ձեռքում»,– ասել է Տոլոսան։

ԱՄՀ երևանյան գրասենյակի ղեկավարը նաև նշել է, որ Հայաստանի տնտեսության զարգացմանը խոչընդոտում է որոշ հարևանների հետ հարաբերություներ չունենալու հանգամանքը։  Վերակառուցման և զարգացման եվրոպական բանկի հայաստանյան գրասենյակի ղեկավար Վալերի Ռազլոգն էլ նշեց, որ Հայաստանի տնտեսությունն այսօր ունի դիվերսիֆիկացիայի խնդիր։ Նա ըդգծեց, որ համաձայն 2009-2010 թթ.–ին Համաշխարհային բանկի հետ համատեղ իրականացված հետազոտության՝ Հայաստանի առաջին խնդիրը ստվերային տնտեսությունն է։ Որպես երկրորդ խնդիր՝ հետազոտությունում ընդգրկված շուրջ 350 գործարարներ նշել են երկրի անկայուն քաղաքական վիճակը։