Հարցազրույց «Ժառանգություն» խմբակցության պատգամավոր Զարուհի Փոստանջյանի հետ

–Մարտի 3–ին բացօթյա առևտրով զբաղվող ցուցարարների, Ձեր և ոստիկանության բախումից հետո ՀՀ վարչապետ Տիգրան Սարգսյանը Ստեփան Սաֆարյանի և Արմեն Մարտիրոսյանի ներկայությամբ հանձնարարել էր ծառայողական քննություն անցկացնել։ Սակայն այդ հանձնարարականից ժամեր անց ոստիկանությունը հաղորդագրություն տարածեց, որտեղ կատարվածում մեղադրվում էին «Ժառանգության» պատգամավորները։ Այսպիսով կարելի՞ է ենթադրել, որ «ծառայողական քննությունն», ըստ էության, ավարտված է։

–ՀՀ–ն ունի պարտավորություններ, համաձայն որոնց՝ եթե նման դեպքեր են լինում, ոչ թե միայն ծառայողական քննություն պետք է իրականացվեր, այլ պարտադիր պետք է քրեական գործ հարուցվեր, և վերջինի քննության շրջանակներում նոր պարզեին, թե ինչ է տեղի ունեցել, ոքեր էին իրապես մեղավոր և որպես մեղադրյալ ներգրավվեին։ Սակայն ՀՀ կառավարությունը գնաց մեկ այլ ճանապարհով։ Քանի որ ակնառու էր դեպքը, բոլորն այդ մասին խոսում էին, բոլոր կայքերը տեղադրել էին տեղի ունեցածի մասին նյութերը, և կառավարությունն այդ տեղեկատվության տարածմանը դեմ ասաց, որ իբրև թե անցկացնեն ծառայողական քննություն։ Մինչդեռ մենք այդպես էլ չհասկացանք՝ ծառայողական քննությունը տեղի ունեցե՞լ է, թե՞ ոչ, որովհետև այդ հայտարարությունից անմիջապես մի քանի ժամ հետո ՀՀ կառավարությանն առընթեր ոստիկանության մամուլի ծառայության միջոցով հրապարակվեց երկու, նույնիսկ իրարամերժ, հաղորդագորություն։ Մենք հիմա հասկանում ենք, որ ծառայողական քննություն՝ որպես այդպիսին՝ օրենքով նախատեսված կանոնների համաձայն, տեղի չի ունեցել։ Եթե ծառայողական քննություն տեղի ունենար, ապա պետք է բացատրություններ վերցվեին բոլոր այն անձանցից, ովքեր այդ գործողությունների մասնակիցն էին. խոսքը ոստիկանության մասին է։ Ծառայողական քննության բոլոր նյութերն էլ պետք է հրապարակվեն, մինչդեռ ոստիկանությունն իր այդ հաղորդագրությունների մեջ հրապարակում է ուղղակի մեկ էջանոց տեղեկատվություն, որն իրականությանը չի համապատասխանում և իրարամերժ է։ Իհարկե, դա մենք չենք կարող դիտարկել որպես ծառայողական քննության արդյունքներ։ Հիմա մենք Հատուկ քննչական ծառայություն հաղորդում ենք ներկայացրել հանցագործության մասին, որի ժամկետների համաձայն առնվազն 10 օրվա ընթացքում պետք է պատասխան տրվի՝ որոշման տեսքով։ Որոշումը պետք է լինի հետևյալը՝ կա՛մ հարուցել քրեական գործ, կա՛մ մերժել քրեական գործի հարուցումը։ Եթե քրեական գործի հարուցումը մերժվի, ապա մենք այդ քրեական գործի հարուցման որոշումը բողոքարկելու ենք դատական կարգով։ Եթե դատարանը գտնի, որ քրեական գործի հարուցումը մերժելն օրինական էր, և թողնի նույնը, ապա մենք այդ որոշումը կբողոքարկենք Մարդու իրավունքների եվրոպական դատարանում։

–Հատուկ քննչական ծառայություն ձեր ներկայացրած հաղորդումից անմիջապես հետո ՀՔԾ–ն իր կայքում հաղորդագրություն տեղադրեց, որտեղ նշված է, որ քրեական գործ է հարուցվել 2011թ. մարտի 3-ին Հանրապետության հրապարակի տարածքում փողոցային  առևտուրն արգելելու որոշման դեմ բողոքի ակցիայի մասնակիցների կողմից հասարակական կարգը խախտելու և իշխանության ներկայացուցիչ հանդիսացող` ՀՀ ոստիկանության ՊՊԾ գնդի աշխատակիցների նկատմամբ ոչ վտանգավոր բռնություն գործադրելու դեպքի առթիվ: Ինչպե՞ս կմեկնաբանեք ՀՔԾ–ի այս պատասխան քայլը։

–Առնվազն տարօրինակ է, երբ որ մարտի 4–ին են քրեական գործ հարուցում, բայց տեղադրում են մարտի 9–ին՝ անմիջապես մեր հաղորդագորությունից հետո։ Եվ հետո տարօրինակ է, որ նյութերի նախապատրաստման ընթացքում միայն մեկ դրվագով է քրեական գործ հարուցվել։ Եվ ինչո՞ւ մեր հաղորդագրության մեջ նշված 7 հարցերի վերաբերյալ քրեական գործ չի հարուցվել, ու մեր նկատմամբ բռնություններին ինչո՞ւ անդրադարձ չի եղել։ Սա նորից խոսում է այն վարքագծի մասին, որ համատեղ դրսևորում են ՀՀ ոստիկանության աշխատակիցները և Հատուկ քննչական ծառայությունը։ Այսինքն՝ հանցագործ վարքագիծ, որը համատեղ դրսևորվում է այս խմբավորումների կողմից։ Սա հենց այնպես չէ։ Մենք մեր հաղորդագրության մեջ էլ ենք նշել՝ ՀՀ ոստիկանության պետը դեռ ապրիլ ամսին քաղաքական հայտարարություններ էր անում՝ բռության կոչերով, որ ինքն օրորոցում պետք է խեղդի։ Սա դրա տրամաբանական շարունակությունն է՝ մի վարքագիծ, որը դրսևորվում է ոստիկանության, Հատուկ քննչական ծառայության և այլ իրավապահ մարմինների կողմից. մենք ոչ թե օրենքի տառին համաձայն պետք է  գործենք, այլ մենք գործում ենք մեր ցանկությունների համաձայն։ Իսկ իրենց վարքագիծն ու ցանկությունն այն է, որ կիրառեն բռնություն և այդ բռնության շնորհիվ պահեն իրենց իշխանությունը։

–Մարտի 3–ի երեկոյան հեռուստատեսությամբ միևնույն կադրերը ցուցադվեցին, որտեղ անձամբ Դուք ներկայացվում էիք պատգամավորին ոչ հարիր պահվածքով։ Ձեր կուսակիցները դա բնութագրեցին զուտ որպես չարաճճիություն։ Անձամբ Դուք ինչպե՞ս կմեկնաբանեք այդ պահվածք։

–Նախ, ինձ համար շատ հետաքրքիր է, թե այդ կադրերը հեռուստատեսությունն ումից է ստացել։ Դա ոստիկանության «02»–ի տեսախցիկը չէր, այլ մի անձ էր՝ քաղաքացիական հագուստով, իհարկե՝ ոստիկանների կողքին, և նկարահանում էր։ Երբ կադրեր են ցույց տալիս, ապա հղում պետք է կատարեն, թե որտեղից են վերցված այդ կադրերը։ Մենք այդպես էլ չտեսանք, թե ումից էին նրանք այդ կադրերը վերցրել։ Իրենք գիտեն՝ մենք ում ենք այդ ժեստերը փոխանցել։ Այդ ժեստերը փոխանցվել են ա՛յդ տեսախցիկին։ Իսկ ինտերնետում տեղադրված բոլոր ձայնագրություններում երևում է այդ անձը՝ քաղաքացիական հագուստով։ Մենք ասել ենք և հատուկ հայտարարել ենք, որ սա կփոխանցեք ձեր պատվիրատուներին, նշել ենք նաև՝ ովքեր են այդ պատվիրատուները։ Եվ ա՛յս ամենը չցույց տալով, մոնտաժելով, հղում չկատարելով, թե ինչպես են այդ կադրերը հայտնվել հեռուստաընկերությունների մոտ՝ ես գտնում եմ և պնդում, որ նրանք համատեղ, ապօրինի գործունեություն են ծավալում, որպեսզի կոծկեն ոստիկանության գործած հանցագործությունները։ Այստեղ մի շղթա է գնում, իսկ պատվիրատուներն այս դեպքում միմիայն կարող են լինել բարձրաստիճան պաշտոնատար անձինք։ Դա կարող է լինել ՀՀ նախագահի պաշտոնը զբաղեցնող անձ Սերժ Սարգսյանը, դա կարող է լինել ՀՀ վարչապետ Տիգրան Սարգսյանը, որովհետև այդ օպերացիան հրահանգված էր։ Երբևիցե չէր եղել նման դեպք, որ ՀՀ կառավարության շենքի հարակից տարածքն ամբողջությամբ փակված լիներ, և այնտեղ թույլ չտային, որպեսզի մարդիկ տեղաշարժվեին և գային, իրենց բողոքի ձայնը բարձրացնեին։ Բայց մեկ շաբաթ առաջ ականատես եղանք։ Հետևաբար, այդ տարածքն այդքան ոստիկանական ուժերով փակելը միայն կարող էր հրահանգված, պատվիրված լինել բարձրաստիճան պաշտոնյաների կողմից։ Այս ամենը մի ապօրինի շղթայի գործողությունների արտացոլանքն է։

–Մարտի 13–ին տեղի է ունենալու «Ժառանգության» ընդլայնված նիստը։ Տարաբնույթ տեղեկություններ եղան այդ նիստի ժամանակ պատգամավորական ձեր մանդատները վայր դնելու հարցը քննարկելու վերաբերյալ։  Ի վերջո՝ այդ հարցը քննարկվելո՞ւ է, թե՞ ոչ։

–Նիստը տեղի կունենա ամսի 13–ին, և դուք տեղեկացված կլինեք նիստի ընթացքում ընդունված որոշումների մասին։ Թե ինչպիսի հարցեր կքննարկվեն, և ինչպիսի լուծում կստանան այդ հարցերը, դուք կիմանաք։

–Իսկ ԱԺ աշխատանքները բոյկոտել–չբոյկոտելու հարցն է՞լ է վերջնականապես քննարկվելու այդ նիստի ժամանակ։

–Բոլոր հարցերը կքննարկվեն, որովհետև այսօր բոլոր հարցերն օրակարգում են, և թե ինչ ձևաչափով արդյունավետ կլինի ապագայում «Ժառանգություն» կուսակցության աշխատանքը, այդ արդյունավետության ձևաչափը մենք պետք է որոշենք։ Եվ թե որն է լինելու արդյունավետության ամենալավ ձևաչափը, հենց այդ ձևաչափն էլ պետք է արտացոլված լինի մեր որոշման մեջ։

Հարցազրույցը վարեց Արեգնազ Մանուկյանը