Մեկնաբանելով «Ժառանգություն» կուսակցության հետ կապված վերջին միջադեպը՝ «Ժողովրդական» կուսակցության նախագահ Տիգրան Կարապետյանն ասել է, թե «Ժառանգությունը» քաղաքական դաշտում ակտիվացել է, և դա շատ լավ է։

–«Ժառանգության» գործոնն ընդհանուր առմամբ ես դրական եմ գնահատում՝ չնայած հասկանալի է, որ իրենք ցանկանում են հեղինակություն ձեռք բերել։ Բայց հեղինակությունը պետք է ոչ թե ոլորտ առ ոլորտ ձեռք բերել, պետք է մեծ զանգվածներ լինեն,–ասել է Տիգրան Կարապետյանը։

Նա նշել է, որ իրենք համագործակցության եզրեր միշտ փնտրում են և անպայման կգտնեն, քանի որ դաշտը մենաշնորհել չի կարելի, ինչը, նրա խոսքերով,  անում է ՀԱԿ–ը։

Անդրադառնալով ոստիկանության հետ բախմանը՝ նա նշել է, թե պետք է բախվել ոչ թե ոստիկանության հետ, թեև դա էլ է հարկավոր, եթե առիթը կա, այլ՝ իշխանավորի.

–Ոստիկանը ծառայող է։ Իրեն կանգնեցնում են, ինքն իր պաշտոնից է վախենում, չնայած ես համարում եմ, որ եթե պետք է բախվել, ուրեմն պետք է բախվել։ Չվախենալ դրանից։

Ինչ վերաբերում է «Ժառանգության» նկատմամբ իր վերաբերմունքի փոփոխությանը, Տիգրան Կարապետյանն ասել է, թե հիմա էլ նույն ձևով է արտահայտվում «Ժառանգության» մասին ու ասում է, որ այն ամերիկյան «պրոյեկտ» է, բայց ընդդիմադիր են։

–Ես համագործակցելու եմ բոլոր ուժերի հետ, որոնք պայքարելու են հանուն արդարության,– ասել է նա։

7or.am