Սահմանադրական փոփոխությունների հարցով հանրաքվեի նշանակումը ոչ միայն արկածախնդություն է, այլև պետական հանցագործություն, իշխանության յուրացում: Այս մասին Tert.am-ի հետ զրույցում ասաց ՀՅԴ ԳՄ անդամ Արծվիկ Մինասյանը:

Նա նշեց, որ ոչ միայն իրենք, այլև բազմաթիվ քաղաքական ուժեր, իրավաբաններ համարում են, որ հանրաքվեի նշանակման գործընթացն իրականացվեց սահմանադրական կարգի կոպտագույն խախտումներով:

«Որպեսզի հասարակության մեջ շփոթ չառաջանա, թե իբր մենք դեմ ենք ընդհանրապես հանրաքվեի գաղափարին, ասեմ, որ այդպես չէ. մենք այն ուժն ենք եղել, որը ոչ միայն կարևորել է անմիջական ժողովրդավարությունը, հանրաքվեն, այլև դա իր պահանջների մեջ է ներկայացրել ... Բայց մենք դեմ ենք նրան, որ այս հանրաքվեի առաջարկն իրականցվում է տոտալ մանիպուլյատիվ հայտարարություններով՝ խախտելով սահմանադրական ընթացակարգը»,-մանրամասնեց Արծվիկ Մինասյանը:

Նրա խոսքով՝ ժողովրդավարական պետության դեմ գործողություն է այն, որ ԱԺ-ում քաղաքական մեծամասնությունն իրեն վերապահել է Սահմանադրությունից դուրս լիազորություն, որ ԱԺ-ն իրեն վերապահել է սահմանադրական դատարանի լիազորություն, որ անտեսելով սահմանադրական կարգավորումներ՝ ԱԺ-ն նաև նախագահին պարտադրեց նշանակել:

Արծվիկ Մինասյանը նաև մտահոգություն հայտնեց խորհրդարանական ընդդիմության վարքագծի հետ կապված: Ըստ նրա՝ նման գործողություններով խորհրդարանական ընդդիմությունը ձեռնտու է իշխանություններին: Արծվիկ Մինասյանը հույս ունի, որ հետագայում, եթե առաջանա հանրաքվեի արդյունքները բողոքարկելու հարց, խորհրդարանական ընդդիմությունը քայլեր կձեռնարկի:

«Եթե խորհրդարանական երկու ընդդիմադիր խմբակցությունները պահեն իրենց այնպես, ինչպես պահեցին հանրաքվեի նշանակման ժամանակ, ապա կստացվի, որ այսօրվա խորհրդարանում չունենք հասարակության ներկայացուցչական մարմին»,-ասաց նա: