Արցախի ժողովրդի ինքնորոշման իրավունքի իրականացումը եղել եւ մնում է կարգավորման օրակարգում: Այս մասին փետրվարի 24-ին մամուլի ասուլիսում ասաց Հայաստանի ԱԳ նախարար Զոհրաբ Մնացականյանը:

Ի պատասխան այն հարցին, թե կարելի՞ է արդյոք վերջին շրջանի գործընթացներից ենթադրել, որ ազգերի ինքնորոշման իրավունքը երկրորդ պլան է մղվել, նախարարը մի հատված ընթերցեց Բրատիսլավայում ԵԱՀԿ ԱԳ նախարարների խորհրդում իր ելույթից:

«Արցախի ժողովրդի ինքնորոշման անքակտելի իրավունքը հիմնարար սկզբունք է եւ խաղաղ կարգավարման հիմքը: Այս սկզբունքի ճանաչումը ենթադրում է, որ Արցախի վերջնական կարգավիճակի որոշումը չի կարող որեւիցե սահմանփակուման ենթարկվել, ինչը պետք է հստակ եւ միանշանակ ընդունվի: «Առանց սահմանափակումների» տերմինը ցույց է տալիս Արցախի ժողովրդի իրավունքը` որոշելու իր կարգավիճակը Ադրբեջանի կառավարման եւ տարածքային ամբողջականության ամբողջ իրավազորությամբ: Ադրբեջանի շարունակական թշնամական քաղաքականությունը եւ դրանից բխող գործողությունները Արցախի ժողովրդի համար էքզիստենցիալ ֆիզիկական անվտանգության սպառնալիք են ստեղծում»,-իր ելույթում հայտարարել էր նախարարը:

«Սա հնչել է 2 ամիս առաջ Բրատիսլավայում եւ առաջին անգամ չի ասվում: Սա հակամարտության հանդեպ մեր մոտեցման կարեւոր տարրն է, չի կարելի այն կասկածի ենթարկել եւ ենթադրել, որ կարելի է անվտանգությունն ու կարգավիճակը իրարից առանձնացնել»,-նշեց ԱԳ նախարարը:

Աղբյուրը՝ News.am