Ադրբեջանական բանակում սպաների կողմից զինվորներին ծեծուջարդի ու տարբեր խոշտանգումների ենթարկելը շատ հանցագործությունների պատճառ են եղել։ Անցկացված դիտարկումները ցույց են տվել, որ հրադադարի ժամանակ մահացած 3500 զինվորների զգալի մասը կյանքից զրկվել է բանակում տեղի ունեցած միջադեպերի հետևանքով։ Այս մասին հայտնում է «Բիզիմ յոլե» թերթը։

Թերթը գրում է, թե փետրվարի 20–ին ադրբեջանական բանակում տեղի ունեցած արյունալի միջադեպից հետո մեկ այլ դեպք էլ գրացվել է Գերանբոյի շրջանում տեղակայված զորամասերից մեկում, որտեղ մի սպա տևականորեն ստորացրել է զինվորներին։

Տեղեկությունների համաձայն՝ զորամասի ավագ լեյտենանտ Անար Ազիզովը երկար ժամանակ զբաղվել է նորակոչիկ զինվորներին բռնաբարելով։ Բռնաբարության ենթարկված զինվորն այս մասին պատմել է իր ծառայող ընկերներին։ Պարզ է դարձել, որ ևս 6 զինվոր ավագ լեյտենանտի կողմից ենթարկվել է խոշտանգումների։

Այս զինվորների ծնողները հարձակվել են զորամասի վրա։ Զորամասի հրամանատարությունը անձնակազմի առջև առերեսել է զինվորներին և ավագ լեյտենանտին: Նրանք կատարվածը հաստատել են։ Ավագ լեյտենանտին անմիջապես ձերբակալել են, իսկ բռնության ենթարկված զինվորները տեղափոխվել են տարբեր զորամասեր։

Թերթը նաև գրում է, որ Ադրբեջանի ՊՆ մամուլի ծառայությունը հրաժարվել է այդ ամոթալի դեպքի վերաբերյալ որևէ տեղեկություն հայտնել իր թղթակցին։