Կառավարության շենքի մոտ տեղի ունեցած միջադեպին անդրադառնալով՝ ՀՀԿ խմբակցության պատգամավոր Հովհաննես Սահակյանը «Հայելի» ակումբում ասել է՝ «Ժառանգությունը» ճիշտ կվարվի, եթե դիմի դատարան։

–Դատապարտում ենք ցանկացած բռնություն և նման դրսևորում։ Ուղղակի եթե կարճ ասելու լինեմ, «Ժառանգությունը» հասավ իր ուզածին, և Ստյոպա Սաֆարյանը փաստի առթիվ մտավ Կապինոսի մոտ,– ասել է Հովհաննես Սահակյանը։

Նրա կարծիքով՝ պատգամավորներն այնտեղ էին իրավիճակը մեղմելու, հարթելու համար և հասարակության այդ շերտին աջակցություն հայտնելու համար, սակայն ստացվել է հակառակը՝ հասարակության այդ հատվածն էր պաշտպանում պատգամավորներին։

ՀՅԴ պատգամավոր Լիլիթ Գալստյանը նշել է, որ ՀՅԴ–ն դեռ երեկ հանդես է եկել հայտարարությամբ և դատապարտել է տեղի ունեցածն ու ընդգծել, որ ՀՀԿ պատգամավորի տեսակետները չի բաժանում.

–Երեկ տեղի ունեցածը մեր իրականության մեջ տեղի ունեցող ցինիկության և անպատժելիության հստակ պատկերներից մեկն է։ Ես անգամ չզարմացա տեղի ունեցածի առիթով, որովհետև նույն ձեռագիրն է շարունակվում, որն ավանդույթներ ունի,–նշել է Լ. Գալստյանը։

Նա ընդգծել է, որ բացի այն, որ այնտեղ ՀՀ քաղաքացիներ էին, որոնք օգտվում էին ցույց անցկացնելու իրենց սահմանադրական իրավունքից, այնտեղ էին նաև ԱԺ պատգամավորներ, և ցավալի է նաև, որ դեպքը տեղի է ունեցել ոչ թե ինչ–որ մի փողոցում, այլ ՀՀ կառավարության շենքի առջև, որը պարտավորված է պաշտպանելու այդ քաղաքացիների շահերը։

–«Ժառանգության» ներկայությունն այնտեղ պատահական չէր։ Պատգամավորներ են, ժողովրդի ընտրյալներ, որ պետք է լինեն ժողովրդի ներկայացուցիչների կողքին՝ փորձելու հասկանալ նրանց շահերն ու խնդիրները։ Այն պատկերները, որ երեկ և այսօր մամուլում տեսանք, ուղղակի վիրավորական են ցանկացած հայ քաղաքացու, իշխանության համար և ցանկացած իշխանության որակի արտահայտությունն են,–ասել է Լիլիթ Գալստյանը։

Նրա խոսքերով՝ իրավական համակարգն այսօր ծառայում է ոչ թե օրենքով իրենց վրա դրված պարտականություններին, այլ տվյալ օրվա իշխանությանը։

–Այդ ոստիկանները 1990թ.–ից նույն վարքագիծն ունեն, որովհետև նրանք իշխանության ոստիկաններն են։ Գնահատականը մեկն է՝ դատապարտում ենք և իսկապես պահանջում ենք, բացի քաղաքականից, նաև իրավական գնահատական,–ընդգծել է Լ. Գալստյանը։

7or.am