Լրագրողների հետ հանդիպման ժամանակ «Ժառանգություն» խմբակցության պատգամավոր Արմեն Մարտիրոսյանը պատասխանելով հարցին, թե ինչպե՞ս կմեկանաբանի այն վերլուծությունները, ըստ որոնց «Ժառանգությունը» կորցրել է իր ընտրազանգվածը, և ընտրազանգված հավաքելու նպատակով է մասնակցում տարբեր տեսակի բողոքի գործողությունների ու  աղմուկ–աղաղակ առաջացնող գործընթացներ հրահրում՝ ասել է.

–Եթե քաղտեխնոլոգի մակարդակն այն է, որ ինքը գտնում է, որ որևէ քաղաքական ուժ կարող է գնալ այլ քաղաքական ուժի հրավիրած միտինգին՝ էլեկտորատ հավաքելու համար, ես ուղղակի այլ ասելիք չունեմ։

Նա նշել է, որ «Ժառանգություն»–ն իր ընտրազանգվածը տեսնում է իր շահառուների մեջ։

–Այն քաղաքացիների մեջ, որոնց իրավունքներն ինքը պաշտպանում է՝ կլինի սոցիալական, տնտեսական, թե քաղաքական գործընթացներին մասնակցելու իրավունք։ Դրան գումարած՝ «Ժառանգության» էլեկտորատն այն քաղաքացիներն են, որոնք իրենց արժեքային համակարգով և գործունեության ձևով իրենց համապատասխան քաղաքական ուժ տեսնում են «Ժառանգությանը», և նմանատիպ վերլուծություն չի կարող լինել։ Ես հասկանում եմ, որ իշխանական պատվեր կա, ինչ–որ բաներ են ներկայացնում, բայց...,–նշել է Արմեն Մարտիրոսյանը։

Նա նաև հրաժարվել է մեկնաբանել ՀԱԿ համակարգող Լևոն Զուրաբյանի՝ Րաֆֆի Հովհանիսյանին ՀԱԿ հանրահավաքին չտեսնելու փաստը։

–Չեմ մեկնաբանում։ Ես կարիք չունեմ Լևոն Զուրաբայնի ասածները մեկնաբանելու,–ընդգծել է նա։

7or.am