Նիկոլ Փաշինյանը բոլոր շանսերն ուներ դատվելու 300.1-րդ հոդվածով, բայց չդատվեց, որովհետև իրավական պրակտիկան ենթադրում է, որ չի կարող դատվել 2008թ․գործողությունների համար։ Այս մասին դատական նիստին ասաց ՀՀ երկրորդ նախագահ Ռոբերտ Քոչարյանի պաշտպանական խմբի անդամ Հայկ Ալումյանը։

Ըստ նրա՝ եթե դատավարությունը տեղի ունենար 2008թ․-ին, ապա միևնույն է, անձինք չէին կարող պատասխանատվության ենթարկվել, քանի որ հոդվածն ի սկզբանե ուներ իրավական որոշակիության խնդիր։ Ալումյանի խոսքով՝ այդ խնդիրներն ի հայտ են եղել, երբ սկսվել է կիրառվել, ընդ որում՝ այն անձանց նկատմամբ, ովքեր այն ժամանակ ընդդիմություն են եղել։

Հիշեցնենք, որ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Աղբյուրը` Փաստինֆո