«5-րդ ալիք» ՀԸ սեփականատեր Արմեն Թավադյանի փաստաբանը դիմել է Վերաքննիչ դատարան՝ խնդրելով հնարավորություն տալ մասնակցել իր բողոքի մակագրման գործընթացին։ Այս մասին «Փաստինֆո»-ին հայտնեց փաստաբան Հովհաննես Խուդոյանը։

Նրա փոխանցմամբ՝ առաջին ատյանի դատարանը Արմեն Թավադյանի գործի վերաբերյալ նյութերը երեկ երեկոյան ուղարկել է վերաքննիչ քրեական դատարան։

Ավելի վաղ տեղեկացրել ենք, որ հունվարի 8-ին Արմեն Թավադյանի փաստաբան Հովհաննես Խուդոյանը վերաքննության կարգով բողոքարկել էր Երևանի ընդհանուր իրավասության դատարանի որոշումը, որով բավարարվել էր Արմեն Թավադյանին կալանավորելու մասին ՀՔԾ քննիչի միջնորդությունը, միևնույն ժամանակ մերժվել փաստաբանի բողոքը, որով վիճարկվում էր Թավադյանին ձերբակալելու որոշման իրավաչափությունը։ Նույն որոշմամբ՝ Երեւանի ընդհանուր իրավասության դատարանը մերժել էր նաեւ Արմեն Թավադյանի նկատմամբ գրավ կիրառելու վերաբերյալ միջնորդությունը։

Երեւանի ընդհանուր իրավասության դատարանի որոշման դեմ վերաքննիչ բողոք ներկայացնելով՝ փաստաբանը պահանջում է փոխել հեռուստաընկերության սեփականատեր Արմեն Թավադյանի խափանման միջոցը եւ նրան ազատել կալանքից, կամ թույլատրելի համարել գրավի կիրառումը։ Ընդ որում, գրավի չափը փաստաբանը թողել է դատարանի հայեցողությանը։