Ավստրալիայում ավելի քան 1 միլիարդ կենդանի Է ոչնչացել ընդգրկուն անտառային հրդեհների հետեւանքով: Վայրի բնության կորուստների ճշտված գնահատումը հունվարի լույս 9-ի գիշերը հրապարակել Է Սիդնեյի համալսարանի մամուլի ծառայությունը, որի գիտնականներից մեկը ղեկավարել Է հետազոտությունը, տեղեկացնում Է «Արմենպրես»-ը:

«Պրոֆեսոր Քրիս Դիքմանը վերանայել Է այն կենդանիների քանակի գնահատումը, որոնք անտառային հրդեհներից ոչնչացել են Նոր Հարավային Ուելսում՝ Նոր Հարավային Ուելսի նահանգում կորուստների հնարավոր չափը 480 միլիոնից ավելացնելով մինչեւ 800 միլիոն: Սպասվում Է, որ համազգային մակարդակով անտառային հրդեհներից վայրի բնության կորուստները կկազմեն մեկ միլիարդից ավելի»,-ասված Է մամուլի ծառայության հաղորդագրության մեջ:

Ավստրալիայում Վայրի բնության համաշխարհային ֆոնդի բաժանմունքը (WWF Australia), հիմնվելով Քրիս Դիքմանի հետազոտության վրա, հրդեհների հետեւանքով սատկած կենդանիների թիվը գնահատում Է 1,25 միլիարդ առանձնյակ:

«WWF Australia-ի գնահատումներով՝ շուրջ 1,25 միլիարդ կենդանի ուղղակիորեն եւ անուղղակիորեն դարձել Է անտառային հրդեհների զոհ, որոնք 8,4 միլիոն հեկտար անտառ են ոչնչացրել ամբողջ Ավստրալիայում: Այդ սոսկալի կորուստը ներառում Է հազարավոր թանկարժեք կոալաներ Նոր Հարավային Ուելսի նահանգի կենտրոնական եւ հյուսիսային ծովեզերքին, ինչպես նաեւ շատ այլ հազվագյուտ տեսակներ»,-ասված Է ֆոնդի բաժանմունքի ղեկավար Դերմոթ Օ’Գորմանի հայտարարության մեջ, հաղորդել Է ՏԱՍՍ-ը: