Ինչպես արդեն տեղեկացրել էինք, այսօր Ֆրանսիայի նախագահ Նիկոլա Սարկոզին աշխատանքային այցով, որը տևելու է ընդամենը մի քանի ժամ,  կժամանի Թուրքիա: Թուրքիայի վարչապետ Ռեջեփ Թայիփ Էրդողանը հայտարարել էր, որ Սարկոզին ժամանելու է ոչ թե Ֆրանսիայի նախագահի, այլ «G-20»-ի նախագահությունը ստանձնած անձի կարգավիճակով:

Իսկ մինչ այդ, Սարկոզին հարցազրույց է տվել թուրք վերլուծաբան Մեհմեթ Ալի Բիրանդին, որն իր հարցերը գրավոր է ուղղել Ֆրանսիայի նախագահին։ «CnnTurk»-ը ներկայացրել է Սարկոզիի պատասխանների հիմնական շեշտադրումները.

- Եվրամիությունը Թուրքիայի իրական տեղը չէ, այլ` Մերձավոր Արևելքը:

- Թուրքիայի եվրաանդամակցությունը մեծ հաշվով ոչ Եվրամիությանը, ոչ էլ Թուրքիային օգուտ չի բերի:

- Թուրքիան կամրջում է արևելքն ու արևմուտքը: Այդ բացառիկ դերակատարություն ուրիշ ոչ մի երկիր չի կարող ունենալ:

- Չպետք է բանտարկված մնանք անցյալի կաղապարների մեջ:

- «G-20»-ում Թուրքիան անփոխարինելի գործընկեր է: Ցանկանում եմ ստանալ Թուրքիայի աջակցությունը «G-20» գործերում: Հիշեցնենք, որ վերջերս Wikileaks-ը գատղնազերծել էր այն փաստը, թե Ֆրանսիայի նախագահ Նիկոլա Սարկոզին Թուրքիային խոստացել է «թաղել» Հայոց ցեղասպանության ժխտման համար քրեական պատասխանատվություն սահմանող ֆրանսիական օրինագիծը Սենատում։