«5-րդ ալիք» հեռուստաընկերության տնօրեն Արմեն Թավադյանի փաստաբան Հովհաննես Խուդոյանը Գլխավոր դատախազությանը ներկայացրել է ԶԼՄ 13 ներկայացուցչի անձնական երաշխավորությամբ միջնորդություն՝ Արմեն Թավադյանի խափանման միջոց կալանավորումը փոխելու համար:

«Միջնորդությունները, որոնք ներկայացվում են վարույթն իրականացնող մարմնին, պետք է քննվեն, և դրանց պետք է պատասխանեն անմիջապես, այսինքն՝ առաջին իսկ հնարավորության դեպքում: Գիտենք, որ դեկտեմբերի 30-ը աշխատանքային օր է, և ակնկալում ենք այդ օրը ստանալ պատասխան»,-ասել է փաստաբան Հովհաննես Խուդոյանը՝ հավելելով, որ, եթե խոսքը անձին կալանավորելու մասին է, հաշվի չի առնվում տվյալ օրվա աշխատանքային լինել-չլինելու հանգամանքը:

Փաստաբանը չի նշել ԶԼՄ 13 ներկայացուցչի անունները՝ հաշվի առնելով, որ ցանկացած անձ կարող է թիրախավորվել: Նա ասել է, որ հայտարարությունը տարածվել է «5-րդ ալիքի» միջոցով, ու ցանկացած անձ կարող է միանալ հրապարակային հայտարարությանը:

«Նկատի ունենալով այն, որ պարոն Թավադյանի կալանքը ակնհայտ ապօրինի է, անձնական միջնորդությունը կարող է հիմք հանդիսանալ: ԶԼՄ 13 ներկայացուցիչները հայտնի անձինք են, ներկայացնում են խմբագրություններ, որոնց դերն ու հեղինակությունը, կարծում եմ, չպետք է կասկածի տակ դրվի»,-ասել է փաստաբանը:

Գլխավոր դատախազության շենքի մոտ տեղի է ունեցել Արմեն Թավադյանի աջակիցների ակցիան: Նրանք «ընտրովի արդարադատություն», «քաղբանտարկյալների երկիր» պաստառներով՝ պահանջում են դադարեցնել, իրենց խոսքով, Արմեն Թավադյանի դեմ իրականացվող քաղաքական հետապնդումը:

Աղբյուրը՝ 168.am