«Ջերմուկ գրուպ» ՓԲԸ-ի սեփականատեր, ՀՀԿ նախկին պատգամավոր Աշոտ Արսենյանի որդու` Վահագն Արսենյանի նկատմամբ քրեական հետապնդումը դադարեցվել է, վերջինիս ներգրավմամբ հարուցված քրեական գործը` կարճվել:

Այս մասին «Հետք» պարբերականի գրավոր հարցմանն ի պատասխան հայտնել են Քննչական կոմիտեի զինվորական քննչական գլխավոր վարչությունից՝ շեշտելով, որ դեկտեմբերի 9-ին որոշում է կայացվել Վահագն Արսենյանի նկատմամբ քրեական հետապնդումը դադարեցնելու և քրեական գործով վարույթը կարճելու մասին:

Հիշեցնենք, որ գործարարի որդուն մեղադրանք էր առաջադրվել զինվորական ծառայությունից առերևույթ ապօրինի հիմքով ազատվելու համար:

Հավելենք, որ գործարարի որդու նկատմամբ քրեական հետապնդման դադարեցումը զարմանալիորեն համընկել է նրա կողմից Երևանի քաղաքապետարանին մեքենաներ նվիրելու հետ: Ավելի վաղ Երևանի ավագանու «Լույս» խմբակցության անդամ Թեհմինա Վարդանյանը հայտարարել էր, որ հստակ տեղեկություններ ունի, որ սեպտեմբերին քաղաքապետարանի կողմից «Ջերմուկ Գրուպ» ընկերությանը տրվել են Արշակունյաց 18, 18/4, 18/5 և 18/10 հասցեներում շինարարական աշխատանքներ իրականացնելու թույլտվություններ, իսկ փոխարենը՝ ստացել 5 ձնամաքրման մեքենա։

Ուշագրավ է, որ Քննչական կոմիտեին չի պարզաբանել, թե ինչ հիմքով է կարճվել Աշոտ Արսենյանի որդու դեմ հարուցված քրեական գործը: Իսկ թե ինչի դիմաց է այդ նվերները մատուցել գործարարը, պատկան մարմինները դարձյալ լռում են:

Հիշեցնենք, որ Երևանի քաղաքապետ Հայկ Մարությանն այսօր լրագրողների հետ զրույցում հաստատել է տեղեկությունը՝ ասելով, որ «Ջերմուկ գրուպ»-ի հետ ձյուն մաքրող 5 մեքենա նվիրելու պայմանավորվածություն է եղել, բայց ընկերությունը դեռ երկու հատն է նվիրել: