Այսօր՝ դեկտեմբերի 24-ին, ԵՊՀ ուսանողական խորհրդի նախագահ Դավիթ Ափոյանը բերման է ենթարկվել:

Ինչպես հայտնում է ֆոտոլրագրող Գագիկ Շամշյանը, ԵՊՀ ռեկտորի ժամանակավոր պաշտոնակատար Գեղամ Գևորգյանը իր կաբինետում հարցրել է Դ. Ափոյանին, թե ճանաչում է արդյոք օրեր առաջ համալսարանի իրավաբանական ֆակուլտետի բակային հատվածում տեղի ունեցած վիճաբանության մասնակիցներին, երբ հնչել էին կրակոցներ, նա պատասխանել է, որ չի ճանաչում, ինչից հետո ԵՊՀ են ժամանել ոստիկաններ և Դ. Ափոյանին բերման ենթարկել:

Ինչպես ավելի վաղ հայտնել էր SHAMSHYAN.com-ը, դեկտեմբերի 20-ին, կրակոցներ էին հնչել Երևանում:

Ժամը 16:00-ի սահմաններում ոստիկանության Մարաշի բաժանմունքի քրեական հետախուզության խմբի ծառայողները օպերատիվ տեղեկություններ էին ստացել, որ Ալեք Մանուկյան փողոցի 1 հասցեում՝ Երևանի պետական համալսարանի բակում, վիճաբանություն է տեղի ունեցել և հնչել են կրակոցներ:

Ոստիկանները պարզել էին, որ ժամը 14:00-ի սահմաններում ԵՊՀ իրավաբանական ֆակուլտետի բակային հատվածում վիճաբանություն է տեղի ունեցել մի խումբ անձանց միջև, որի ժամանակ էլ հնչել են կրակոցներ:

Դեպքի վայր ժամանած ոստիկանության Մարաշի բաժանմունքի ծառայողները զննություն էին կատարել տեղանքում, որտեղ հայտնաբերել են 2 հատ 9 մմ տրամաչափի կրակված պարկուճներ:

Գ. Շամշյանի տեղեկություններով՝ ոստիկանները պարզել էին վիճաբանության մասնակիցների ինքնությունը, որոնց տվյալները նախաքննության շահերից ելնելով՝ այս պահին չենք հրապարակում:

Փաստի առթիվ նյութեր էին նախապատրաստվում: