Թուրքիայի Կրոնական գործերի վարչության` 2019թ. 11 ամիսների ընթացքում իրականացրած ծախսերը հասել են 9.6 մլրդ թուրքական լիրայի (1.62 մլրդ դոլար): Այդպիսով 11 ամսում իրականացրած ծախսերի ծավալով կրոնական գործերի վարչությունը առաջ է անցել Թուրքիայի 6 նախարարությունից:

Համեմատության համար նշենք, որ 2019թ. 11 ամսում օրինակ Թուրքիայի արտգործնախարարությունը ծախսել է 3.9 մլրդ լիրա, էներգետիկայի և բնական պաշարների նախարարությունը` 2.3 մլրդ լիրա, մշակույթի և զբոսաշրջության նախարարությունը` 5.2 մլրդ լիրա, արդյունաբերության և տեխնոլոգիայի նախարարությունը` 6.4 մլրդ լիրա, Շրջակա միջավայրի պահպանության նախարարությունը` 6.5 մլրդ լիրա և առևտրի նախարարությունը` 4.1 մլրդ լիրա:

2019թ. բյուջեով կրոնական գործերի վարչությանը նախատեսված գումարի չափը կազմում էր 10.4 մլրդ լիրա, սակայն ավելի ուշ կրճատվել և դարձել էր 7.4 մլրդ լիրա:

Աղբյուրի փոխանցմամբ` ի հեճուկս այս հատկացված գումարի` կրոնական գործերի վարչությունը 11 ամսում իր ծախսերով գերազանցել է սահմանված գումարի չափը:

2020թ. բյուջեով Թուրքիայի կրոնական գործերի վարչությանը հատկացվելու է 11.5 մլրդ լիրա:

Աղբյուրը՝ ermenihaber.am