«Իմ ձայնը» հ/կ-ն եւ «Անտիֆեյք»-ը հրապարակել էին հետաքննության եւ վերլուծության տվյալներ՝ ներկայացնելով «Իմ քայլը» խմբակցության մի շարք պատգամավորների՝ 2018թ.-ի եկամտի եւ դրամական միջոցների հայտարարագրերը եւ նախընտրական տարում «Իմ քայլը» դաշինքի նախընտրական հիմնադրամին նրանց կողմից կատարված նվիրատվությունները, որոնք որոշ դեպքերում մի քանի միլիոնով գերազանցում են հայտարարագրում նշված գումարի չափը:

Հեղինակներն այս հրապարակմամբ կասկած են հայտնել, որ գուցե կոռուպցիոն սխեմա է գործել: Aravot.am-ի հետ զրույցում ԱԺ «Իմ քայլը» խմբակցության պատգամավոր Հրաչյա Հակոբյանը, որը հիմնադրամին, ըստ նշյալ հետաքննության, փոխանցել է 1 միլիոն 363 000 դրամ, հետեւյալ կերպ պարզաբանեց. «Այս պահին դաշինքի հիմնադրամին նվիրաբերած գումարի թիվը հստակ չեմ հիշում: Ինչ վերաբերում է նրան, որ դրանից ավելի քիչ գումար եմ հայտարարագրած եղել, ապա տեղեկացնեմ, որ նախընտրական դրամահավաք եմ ինքս կազմակերպել, քանի որ նաեւ վարկանիշային թեկնածու էի, իմ ծախսերը պետք է հոգայի: Այդ դրամահավաքից ստացված միջոցներից ես նաեւ հատկացրել եմ «Իմ քայլը» դաշինքի նախընտրական հիմնադրամին: Հայտարարագրածս գումարի եւ նվիրատվության գումարի միջեւ տարբերության պատճառն այն է, որ անձնական դրամահավաքից գումար եմ նվիրաբերել հիմնադրամին»:

Հրաչյա Հակոբյանը նշեց, որ դրամահավաքը կազմակերպել է Երեւանի սրճարաններից մեկում. «Երեկոյի ժամանակ հրավիրել էի ծանոթներիս-ընկերներիս, եւ ով որքան ուզեցել է, նվիրաբերել է: Շփվել ենք իրար հետ, տեղեկացրել եմ, որ վարկանիշային թեկնածու եմ, եւ ծախսեր կան անելու, ու հանգանակություն է տեղի ունեցել»: