Եռահարկ, սև սրբատաշ տուֆից կառույցը մինչև այժմ էլ համարվում է քաղաքի եզակի կրթական հաստատություններից մեկը։ Գյումրու հայտնի գիմնազիայի շենքում այսօր գործում է թիվ 6 հիմնական դպրոցը, որը որոշակի խնդիրներ ունի` տանիքի վերանորոգում, ջեռուցման շատ հին համակարգի փոփոխություն է հարկավոր։ Սրանց մասին իմացանք դպրոցի տնօրենի պաշտոնակատար Աննա Ղուկասյանի հետ զրույցի ընթացքում։ Կրթական հաստատության տնօրինությունն ու ուսուցչական անձնակազմը հուսով է, որ պետական միջոցներ կգտնվեն այդ հնագույն կառույցի խնդիրները լուծելու համար:

Գիմնազիան կառուցվում է Նիկոլայ II ցարի և համայնքի կողմից հավաքված հանգանակությունների հաշվին:

1905-1906թթ. պրոգիմնազիան վերածվում է գիմնազիայի, որտեղ արդեն սովորում էին շուրջ 376 աշակերտ, որոնցից 239–ը ազգությամբ հայեր էին, 127-ը` ռուսներ, և 10–ը` այլ ազգի ներկայացուցիչներ: Պարզվում է` բոլոր ցանկացողները չէ, որ կարող էին սովորել այս հաստատությունում. դրա համար պետք էր հատուկ կարգավիճակ։ Աշակերտուհիները հիմնականում ազնվականների և առևտրականների դուստրերն էին։

Իսկ 1912 թ. Արդեն շահագործման է հանձնվում դպրոցի այժմյան շենքը, որը համարվում է քաղաքի լավագույն ճարտարապետական կառույցներից մեկը: «Այստեղ սովորեցրել են կանացի վարվելակերպ և վերաբերմունք, ասեղնագործություն, ձեռագործ, պար, օտար լեզուներ, հատկապես, այդ ժամանակ շատ ընդունված էր ֆրանսերեն»,- մեզ հետ զրույցում պատմում է Գյումրու քաղաքապետի խորհրդական Հասմիկ Կիրակոսյանը՝ նշելով, որ գիմնազիայում այդ տարիներին պատրաստել են նաև բուժքույրեր, ովքեր իրենց հմտություններն օգտագործել են ռուս-թուրքական պատերազմի ժամանակ։

1920թ. գիմնազիան վերածվում է երկրորդ աստիճանի երկսեռ ուսուցմամբ միջնակարգ դպրոցի: 1930 թ.-ին այն դասվում է «օրինակելի դպրոցների» շարքին:

Սպիտակի երկրաշարժի պատճառով դպրոցի շենքը վթարային է դառնում և վերականգնվում միայն 2001 թվականին։ Այսօր թիվ 6 հիմնական դպրոցն ունի ավելի քան 500 աշակերտ։

«Ցայսօր այս շենքն ու իր անունն այս քաղաքում պահպանում են այն պատմական, բարոյական կերպարը, որ ունեցել է։ Այն յուրահատուկ կառույց է քաղաքում»,-նշում է Հասմիկ Կիրակոսյանը։

Դպրոցում սովորել են այնպիսի անձնավորություններ են, ինչպիսիք են բանաստեղծ Հովհաննես Շիրազը, ՍՍՀՄ ժողովրդական արտիստ Հրաչյա Ղափլանյանը, երգահան Ալեքսանդր Աճեմյանը, ակադեմիկոսներ Գևորգ Ղարիբջանյանը, Սերգեյ Համբարձումյանը, դոկտոր-պրոֆեսորներ Թադևոս Աղախանյանը ու Սողոմոն Բալյանը, և ուրիշներ: Իսկ 1890-1900թթ.-ին այստեղ դասավանդել են հայ անվանի գրող Ղազարոս Աղայանը, հայտնի մանկավարժներ Տեր-Գևորգովան, Տեր-Ակոպովը և այլն: