Մենք նախկինում էլ հիմա էլ հայտարարում ենք, որ Երևանի քաղաքապետը պատրաստ է ընդունել նվիրատվություններ այն մարդկանցից, ովքեր մտադրություն ունեն մասնակցել Երևան քաղաքի զարգացմանը: Այս մասին լրագրողների հետ հանդիպման ժամանակ ասաց Երևանի քաղաքապետի մամուլի քարտուղար Հակոբ Կարապետյանը՝ անդրադառնալով Երևանի քաղաքապետարանին արված նվիրատվություններին։

«Հրապարակել եմ հինգ պայմանագիր դրանցով, ընդհանուր առմամբ, 21 մեքենա է նվիրվել Երևան քաղաքին: Այս գույքից բացի ընթացքի մեջ է առնվազն տասը պայմանագիր, որոնցով քննարկվում է, որ քաղաքը նոր գույք կստանա՝ կրկին մեքենաներ»,-ասաց նա և նշեց, որ նախկինում չեն հրապարակել, քանի որ պայմանագրերը դեռ կնքված չեն:

Հակոբ Կարապետյանը նշեց, որ թեև նվիրվատվության այս պրակտիկան Հայկ Մարությանի պաշտոնավարման ժամանակ չի ձևավորվել, սակայն քաղաքապետ Մարությանը խրախուսում է այն, և այն միջազգայնորեն տարածված երևույթ է:

«Հայկ Մարությանը հայտարարեց, որ Սամվել Ալեքսանյանից նվեր կընդունի այնպես, ինչպես բոլորից։ Ի սկզբանե ինչ-որ դիստանցիա պահել, խորշել նրանից նվերներ ընդունելուց, նման բան չկա»,-ասաց նա:

Հակոբ Կարապետյանը նշեց, որ քաղաքապետարանին «Կամազ» բեռնատարներ նվիրաբերած «Ալեքս հոլդինգ» ընկերության հիմնադիր սեփականատեր գրանցված է մեկ անձ, որը Սամվել Ալեքսանյանը չէ, այլ Հայկ Իսրայելյանն է: Ըստ նրա՝ քաղաքապետարանը չունի այդ գործիքակազմը, խնդիրը՝ պարզելու, թե այս կամ այն կազմակերպության հետևում ով է կանգնած:

«Եթե դուք կարծում եք, որ դա «Ալեքս հոլդինգն» է և կապ ունի Սամվել Ալեքսանյանի հետ, ես չեմ կարող, առավելևս Հայկ Մարությանը, անել հայտարարություններ ասեկոսեների, տարածված կարծիքների հիման վրա, առավելևս, որ պախարակելի բան Սամվել Ալեքսանյանից նվեր ընդունելու մեջ չկա»,-ասաց նա։

Աղբյուրը՝ Tert.am