Ռուսաստանի Արմավիր քաղաքի հայկական եկեղեցում բակում տեղի ունեցած միջադեպի մասին տեղեկություն ստանալուց հետո քննչական մարմինները քննություն են սկսել։ Այս մասին ասել է Ռուսաստանի ԱԳՆ պաշտոնական ներկայացուցիչ Մարիա Զախարովան` այսօր կայացած ճեպազրույցում մեկնաբանելով եկեղեցու բակում կատարված վանդալիզմը։

Ավելի վաղ ԶԼՄ–ները հայտնել էին, որ Կրասնոդարի երկրամասի Արմավիր քաղաքի դումայի պատգամավոր Ալեքսեյ Վինոգրադովը սև ներկով ներկել է հայկական եկեղեցու բակում տեղադրված Գարեգին Նժդեհի հիշատակը հավերժացնող հուշատախտակը: Ավելի ուշ Ռուսաստանում Հայաստանի դեսպանատունը վրդովմունք է հայտնել միջադեպի կապակցությամբ։

Զախարովան հաստատել է, որ Ռուսաստանի ԱԳՆ–ը ստացել է Հայաստանի դեսպանատան հայտարարությունը։

«Կարող եմ ասել, որ Ռուսաստանի քննչական մարմինները քննություն են սկսել այդ միջադեպի հետ կապված»,–ասել է նա։

Հիշեցնենք, որ դեսպանատան հայտարարությունում նշվել է, որ Արմավիրում կատարվածը լուրջ մտահոգություն է առաջացրել ինչպես Հայաստանում, այնպես էլ Ռուսաստանում ապրող մեր հայրենակիցների շրջանում: Դիվանագիտական ներկայացուցչությունը վստահեցրել է, որ միջադեպը լինելու է դեսպանության ուշադրության կենտրոնում։

Աղբյուրը՝ armeniasputnik.am