Մամլո ասուլի ժամանակ անդրադառնալով Հայաստանի արտաքին քաղաքական իրավիճակին՝ ՀԱԿ ներկայացուցիչ Դավիթ Շահնազարյանն ասել է, թե ՀՀ կառավարության կազմում եղած նախարարություններից ամենաթույլն ԱԳՆ–ն է:

–ԼՂ խնդրով այսօր հիմնական իրադարձություններն ընթանում են ոչ թե ՄԽ–ի եռանախագահողների ձևաչափում և բուն բանակցություններում, այլ նրա շուրջ` ԵԽԽՎ-ում, երբ սկսել է նորից գործել ԼՂ հարցերով ենթահանձնաժողովը, մոտ ապագայում կհրապարակվի միջազգային փաստահավաք խմբի զեկույցը, որը ակնհյատ է, որ Ադրբեջանը փորձելու է օգտագործել նաև ՄԱԿ–ի Գլխավոր ասամբլեայում,–ասել է նա։

Ըստ Դավիթ Շահնազարյանի՝ Հայաստանը Ադրբեջանի դիվանագիտությանը համարժեք մոտեցում չի ցուցաբերում և չի օգտվում Ադրբեջանի թույլ տված բազմաթիվ սխալներից։

–Սրան եթե գումարենք տարածաշրջանում ստեղծված նոր լարվածությունը, Թուրքիայի նոր ակտիվությունները, ապա չափազանց մեծ է հավանականությունը, որ ներքին խնդիրները՝ սոցիալական, տնտեսական, և արտաքին վտանգերը կարող են միաժամանակ հանդես գալ, որը կարող է մեզ կանգնեցնել շատ ծանր իրավիճակի առաջ: Բոլորդ քաջ գիտեք, որ այսօր նույն ԼՂ հարցի հետ կապված՝ ստեղծվել է մի յուրօրինակ իրավիճակ, երբ պատերազմի վերսկսման հավանականությունը շատ ավելի մեծ է, քան բանակցային գործընթացում որևէ չնչին առաջընթացի հասնելը,–նշել է նա։ Դավիթ Շահնազարյանը վստահեցրել է, թե ստեղծված իրավիճակում միակ ելքը արտահերթ ընտրություններն են:

7or.am