ՀՀ վարչապետ Նիկոլ Փաշինյանը ֆեյսբուքյան ուղիղ եթերում անդրադարձավ Պետական պահպանության ծառայության պետ Գրիգորի Հայրապետովի պաշտոնանկությանը: Նա նշեց, որ վերջինս աշխատանքից ազատվել է իր որոշմամբ` սեփական դիմումի համաձայն, որից հետո պաշտոնանկության վերաբերյալ խոսակցություններ են շրջանառվել:

«Ասում էին, թե Դուշամբեում Ալիևն ու Փաշինյանը, երբ բարձրանում էին վերելակով, այնտեղ դավադիր պայմանավորվածություններ են եղել: Ասում էին, որ այնտեղ է եղել Հայրապետովը, նա լսել է այդ խոսակցությունն ու աշխատանքից ազատվել է հենց այդ պատճառով: Ուրեմն, ես այնքան ապաշնորհ դավադիր եմ և անխելք, որ Ալիևի հետ առաջին շփման ընթացքում դավադրության մեջ եմ ներքաշվում և դա անում եմ Ռոբերտ Քոչարյանի և Սերժ Սարգսյանի 10 տարվա թիկնազորի ներկայությամբ: Մարդ, որի հետ շփվել եմ 4 ամիս: Նա այդքան ժամանակ է եղել իմ թիկնազորի ղեկավարը: Բայց, եթե անգամ այդպես է, դրանից հետո պետք է նրան ոչ թե պաշտոնից ազատեի, այլ պինդ պահեի, քանի որ այդպես նրա լռությունը կարող էի ապահովել, իսկ ազատ մարդը որտեղ, երբ, ինչ ուզենա, կարող է խոսել»,-ասաց Փաշինյանը:

***

ՀՀ վարչապետ Նիկոլ Փաշինյանը ֆեյսբուքյան ուղիղ եթերում խոսեց Ղարաբաղի հարցի շուրջ քննարկումների և շահարկումների մասին, որոնք տեղի են ունենում վերջին 1,5 տարվա ընթացքում: Նա ներկայացրեց մի քանի դիտարկումներ:

«Առաջին դիտարկումն այն է, որ լուրեր են շրջանառվում, թե ՀՀ կառավարությունն ու անձամբ Նիկոլ Փաշինյանը մտադիր են Ղարաբաղը հանձնել: Հետո շրջանառվության դրվեց այն թեզը, թե ես ներքաշված եմ Ղարաբաղի դեմ դավադրության մեջ և, ըստ ամենայնի, պայմանավորված պատերզամով Ղարաբաղը հանձնվելու է: Դա տեղի ունեցավ 2018 թվականին` խորհրդարանական ընտրությունների համատեքստում և ես այդ ժամանակ Սյունիքի մարզում էի, մի քանի սուր ելույթներ ունեցա, ապա ԱԱԾ-ին հանձնարարեցի, որ հրավիրի և հարցաքննի մարդկանց, թե ի՞նչ տեղեկությունների հիման վրա են նման լուրեր հաղորդում:

Հիմա, ամբողջ խնդիրն այն է, որ շրջանառության մեջ է դրվում երրորդ թեզը: Ասում են, թե կառավարությունը կամ վարչապետը չի համաձայնվում հանձնել կամ զիջումներ անել, դա նշանակում է, որ բանակցությունները մտել են փակուղի և սկսել են մարդկանց վախեցնել պատերազմով: Բյուջեներ են բաց թողնվում, քարոզչություններ են արվում այս թեմայով և այլն:

Այն իրավիճակը, որ մենք ունենք հայ-ադրբեջանական հարաբերություններում, միշտ էլ վտանգներ է պարունակում, սակայն դրանք ավելին չեն, քան եղել են 3, 4 կամ 5 տարի առաջ: Եթե մոնիթորինգի ենթարկենք սահմանային իրավիճակը, կտեսնենք, որ նախորդ 1,5 տարվա ընթացքում, լարվածության կտրուկ և էական անկում ունենք և դա տեղի է ունցել Դուշամբեի հայտնի քննարկումների համատեքստում, ինչը չի նշանակում, թե լարվածություն չկա: Ցավոք սրտի, մենք ունենք զոհեր»,-ասաց Փաշինյանը:

Փաշինյանի խոսքով, սակայն, բանակցային գործընթացում կա դրական դինամիկա և նա հույս հայտնեց, որ այն կզարգանա:

«Բացառվում են դավադրությունները Ղարաբաղի հարցում: Սա իմ հարցը չէ, սա խմբի հարց չէ, սա համազգային հարց է: Բանակցությունները վարվում են հետևյալ տրամաբանությամբ. ես ասել եմ, որ այս հարցի որևէ լուծում պետք է ընդունելի լինի Հայաստանի, Ղարաբաղի և Ադրբեջանի ժողովուրդների համար: Իմ խնդիրն է բանակցային սեղանի շուրջ փնտրել և գտնել Հայաստանի, հայ ժողովրդի համար ընդունելի լուծում: Եվ երբ բանակցային գործընթացում կձևակերպվի այնպիսի լուծում, այնպիսի առաջարկ, որն ընդունելի կլինի հայ ժողովրդի համար, այն կներկայացնեմ, կլինի համազգային քննարկում և որոշումները կկայացվեն համազգային ֆորմատով»,-ասաց նա:

Փաշինյանը նշեց, որ վերջին շրջանում շատ է շահարկվում այն թեման, թե Հայաստանի և Արցախի իշխանությունների միջև կան հակասություններ և փորձ է արվում ներկայացնել, թե Արցախի հարցում կա նման իրավիճակ: Նա արձանագրեց, որ Հայաստանի և Ղարաբաղի իշխանության պատկերացումներն Արցախի հարցի կարգավորման վերաբերյալ նույնական են:

«Այլ կերպ լինել չի կարող: Այս թեմայով որևէ շահարկում լինել չի կարող: Այս թեմայով հաճախ եմ քննարկումներ ունենում Արցախի նախագահ Բակո Սահակյանի հետ»,-ասաց Փաշինյանը:

Աղբյուրը՝ Tert.am